முல்லைப் பெரியாறு அணை நீர்மட்டம் 136 அடியாக உயர்வு

'ரூல் கர்வ்' விதிப்படி உபரி நீர் வெளியேற்றம்

- 

உத்தமபாளையம், ஜூன் 29: முல்லைப் பெரியாறு அணை நீர்மட்டம் 136 அடியாக உயர்ந்ததையடுத்து, 'ரூல் கர்வ்' விதிப்படி அணையிலிருந்து உபரிநீராக வினாடிக்கு 250 கனஅடி கேரள பகுதிக்கு தமிழக நீர் வளத் துறையினர் சனிக்கிழமை நள்ளிரவு திறந்துவிட்டனர்.

நீர்பிடிப்புப் பகுதிகளில் தென்மேற்குப் பருவமழை தொடர்வதால் முல்லைப் பெரியாறு அணை நீர்மட்டம் 136 அடியை (மொத்த உயரம் 152 அடி) எட்டியது. இதில் 142 அடி வரை தண்ணீரைத் தேக்கிக் கொள்ளலாம் என உச்சநீதிமன்றம் ஏற்கெனவே கடந்த 2014-ஆம் ஆண்டு உத்தரவிட்டது. இதன்படி, கடந்த 2014, 2015, 2018 ஆகிய 3 ஆண்டுகளில் 142 அடி வரையில் அணையில் தண்ணீர் தேக்கப்பட்டது.