ஆண்ட்ரீவா, ரைபகினா முன்னேற்றம்

யுஎஸ் ஓபன் டென்னிஸ் போட்டியில் ரஷியாவின் மிரா ஆண்ட்ரீவா, கஜகஸ்தானின் எலனா ரைபகினா ஆகியோர் 2-ஆவது சுற்றுக்கு செவ்வாய்க்கிழமை முன்னேறினர்.

- 

நியூயார்க், ஆக. 26:

மகளிர் ஒற்றையர் முதல் சுற்றில், போட்டித்தரவரிசையில் 5-ஆம் இடத்திலிருக்கும் ஆண்ட்ரீவா 6-0, 6-1 என மிக எளிதாக, உள்நாட்டு வீராங்கனை அலிசியா பார்க்ஸை வீழ்த்தினார். அடுத்த சுற்றில் அவர், சக ரஷியரான அனஸ்தாசியா பொடாபோவாவை எதிர்கொள்கிறார்.

9-ஆம் இடத்திலிருக்கும் ரைபகினா 6-3, 6-0 என்ற செட்களில் அமெரிக்காவின் ஜூலிடா பரேஜாவை சாய்த்தார். ஆஸ்திரேலிய ஓபன் நடப்பு சாம்பியனான அமெரிக்காவின் மேடிசன் கீஸ் 7-6 (12/10), 6-7 (3/7), 5-7 என்ற வகையில் மெக்சிகோவின் ரெனெட்டா ஜராஜுவாவிடம் அதிர்ச்சித் தோல்வி கண்டார்.