டெல்டா மாவட்டங்களில் இலக்கை விஞ்சியது குறுவை சாகுபடி

மேட்டூர் அணை நிகழாண்டு உரிய காலத்தில் திறக்கப்பட்டதால், டெல்டா மாவட்டங்களில் குறுவை பருவ நெல் சாகுபடிப் பரப்பளவு இலக்கை விஞ்சியுள்ளது.

- நமதுநிருபர்

தஞ்சாவூர், ஆக. 6: மேட்டூர் அணை நிகழாண்டு உரிய காலத்தில் திறக்கப்பட்டதால், டெல்டா மாவட்டங்களில் குறுவை பருவ நெல் சாகுபடிப் பரப்பளவு இலக்கை விஞ்சியுள்ளது.

கடந்த ஆண்டு மேட்டூர் அணையில் போதிய அளவுக்கு தண்ணீர் இல்லாததால், கால தாமதமாக ஜூலை 28-ஆம் தேதி திறக்கப்பட்டது. இதனால், டெல்டா மாவட்டங்களில் குறுவை சாகுபடிப் பரப்பளவு குறைந்தது. நிகழாண்டு மேட்டூர் அணை உரிய காலமான ஜூன் 12-ஆம் தேதி திறக்கப்பட்டது. இதன் மூலம், டெல்டா மாவட்டங்களில் நிகழாண்டு குறுவை பருவ நெல் சாகுபடிப் பரப்பளவு இலக்கை விஞ்சியுள்ளது.

இதில், தஞ்சாவூர் மாவட்டத்தில் 1.96 லட்சம் ஏக்கரில் குறுவை சாகுபடி செய்ய இலக்கு நிர்ணயிக்கப்பட்ட நிலையில், அதை விஞ்சி உத்தேசமாக 1.97 லட்சம் ஏக்கரில் சாகுபடி நடைபெறுகிறது. கணக்கெடுப்பு சரிபார்ப்பு பணி இறுதி செய்யப்பட்ட பிறகு, இந்தச் சாகுபடிப் பரப்பு இன்னும் அதிகமாக இருக்கும் என வேளாண் துறை யினர் தெரிவித்தனர்.