நிகழாண்டும் இலக்கை விஞ்சும் நெல் சாகுபடி

விவசாயிகள் நம்பிக்கை

- நமது நிருபர்

திருச்சி, ஜூலை 7: திருச்சி மாவட்டத்தில் 2024-25 ஆம் ஆண்டில் குறுவை, சம்பா, நவரை என மூன்று பட்டங்களிலும் நெல் சாகுபடி பரப்பு இலக்கை விஞ்சி 114 விழுக்காடு என்ற சாதனையை எட்டியுள்ளது. இதையடுத்து நிகழாண்டும் இந்தச் சாதனை தொடருமா? என்ற கேள்வி எழுந்துள்ளது.

திருச்சி மாவட்டத்தில், நெல் சாகுபடியானது முக்கிய வேளாண்மை தொழில்களில் ஒன்றாகும். காவிரி மற்றும் கொள்ளிடம் ஆறுகளின் மூலம் கிடைக்கும் நீர்ப்பாசன வசதியால், இப்பகுதி நெல் சாகுபடிக்கு மிகவும் ஏற்றதாக உள்ளது.

இங்கு இறவை பாசனம் மற்றும் மானாவாரி நிலங்களிலும் நெல் சாகுபடி செய்யப்படுகிறது. முன்பு மாவட்டத்தில் ஏறத்தாழ 1,41,282 ஹெக்டேர் நிலப்பரப்பில் நெல் சாகுபடி செய்யப்பட்டது. இதில், 98,739 ஹெக்டேர் இறவைபாசனத்திலும், 66,652 ஹெக்டேர் மானாவாரி நிலங்களிலும் சாகுபடி செய்யப்படுவது வழக்கம். குறுவை ஜூன், ஜூலையில் தொடங்கும். சம்பா ஆகஸ்ட் மாதம் தொடங்கும். நவரை டிசம்பர் மாதத்தில் தொடங்கும்.

நீர் திறப்பும், சாகுபடியும்: பாசனத்துக்காக மேட்டூர் அணையிலிருந்து ஆண்டுதோறும் ஜூன் 12-ஆம் தேதி தண்ணீர் திறக்கப்படும். ஜனவரி 28-ஆம் தேதி வரை தண்ணீர் விநியோகம். இப்படி முறையாக இருந்தால், காவிரி-டெல்டாவில் 3-போகம் சாகுபடிக்கு 330 டிஎம்சி தண்ணீர் தேவைப்படும்.