தனியார் ஹஜ் பயணக் கட்டணம் பல லட்சம் உயர்வு

வெளிப்படைத்தன்மையை ஏற்படுத்த வலியுறுத்தல்

- அ. சர்ப்ராஸ்

புது தில்லி, ஏப். 20: இஸ்லாமியர்களின் ஹஜ் யாத்திரைக்கு தனியார் நிறுவனங்களுக்கு ஒதுக்கப்பட்ட 42,507 இடங்கள் ரத்தானதால், ஹஜ் பயணத்துக்கான கட்டணம் பல லட்சம் உயர்ந்துள்ளது.

கடைசி நேரத்தில் பயண இடங்கள் ரத்தானதால் நாடு முழுவதும் உள்ள ஹஜ் பயணிகள் பெரும் இன்னலுக்கு ஆளாகி உள்ளனர்.

இதுபோன்று வருங்காலங்களில் ஏற்படாமல் இருக்க தனியார் ஹஜ் பயணத்துக்கான பல்வேறு கட்ட செலவுகளை வெளிப்படைத்தன்மையுடன் இணையத்தில் அரசு அறிவிக்க வேண்டும் என்ற கோரிக்கை எழுந்துள்ளது.

கட்டாயக் கடமை: இஸ்லாமியர்களின் கட்டாயக் கடமையான புனித ஹஜ் பயணத்தை வாழ்நாளில் ஒரு முறையாவது நிறைவேற்ற உலகம் முழுவதும் உள்ள 25 கோடி பேர் வாழ்நாள் முழுவதும் பணத்தை சேமித்து வைக்கிறார்கள்.

சுமார் 20 கோடி இந்திய முஸ்லிம்களுக்காக சவூதி அரேபியா ஆண்டுதோறும் ஹஜ் பயண இடங்களை ஒதுக்கி வருகிறது. கடந்த 2014-இல் 1,36,020-ஆக இருந்த இடங்களின் எண்ணிக்கை படிப்படியாக அதிகரித்து நிகழாண்டு 1,75,025-ஆனது.

இதில், 1,22,518 இடங்கள் அரசு சார்பில் ஹஜ் கமிட்டிகளுக்கும், மீதமுள்ள 52,507 இடங்கள் தனியார் நிறுவனங்களுக்கும் ஒதுக்கப்பட்டது.