கடலூர் அருகே தடையை மீறி முந்திரி மரக்கன்றுகள் நடும் போராட்டம்

மார்க்சிஸ்ட் மாநிலச் செயலர் உள்பட 125 பேர் கைது

- 

நெய்வேலி, மார்ச் 21: கடலூர் மாவட்டம், நடுவீரப்பட்டு அருகே மலையடிக்குப்பத்தில் வெள்ளிக்கிழமை தடையை மீறி முந்திரி மரக்கன்றுகள் நடும் போராட்டத்துக்கு சென்ற மார்க்சிஸ்ட் கம்யூனிஸ்ட் மாநிலச் செயலர் பெ.சண்முகம் உள்பட 125 பேரை போலீஸார் தடுத்து நிறுத்தி கைது செய்தனர்.

அப்போது, போலீஸாருக்கும், பொதுமக்களுக்கும் இடையே வாக்குவாதம், தள்ளுமுள்ளு ஏற்பட்ட நிலையில், பெண்கள் மயங்கி விழுந்தனர்.

கடலூர் வட்டம், வெள்ளைக்கரை ஊராட்சிக்கு உள்பட்ட மலையடிக்குப்பம், பெத்தாங்குப்பம், கொடுக்கன்பாளையம், கீரப்பாளையம் உள்ளிட்ட கிராமங்களில் உள்ள சுமார் 160 ஏக்கர் அரசு தரிசு நிலங்களில் 150-க்கும் மேற்பட்ட குடும்பத்தினர் முந்திரி, பலா, தென்னை உள்ளிட்ட பயிர்களை சாகுபடி செய்து வந்தனர்.

அரசு நிலங்களில் இருந்த ஆக்கிரமிப்புகள் அகற்றப்படுவதாகக் கூறி, இந்தப் பகுதியில் விவசாய பயிர்கள் மற்றும் முந்திரி உள்ளிட்ட ஆயிரக்கணக்கான மரங்களை ராட்சத இயந்திரங்கள் மூலம் கடலூர் மாவட்ட நிர்வாகம் கடந்த ஜனவரி 29-ஆம் தேதி வேரோடு பிடிங்கி அழித்தது.