வரைவுப் பட்டியல் வெளியீடு: உ.பி.யில் 2.89 கோடி வாக்காளர்கள் நீக்கம்

உத்தர பிரதேசத்தில் வாக்காளர் பட்டியல் சிறப்பு தீவிர திருத்தத்துக்கு (எஸ்ஐஆர்) பிறகான வரைவுப் பட்டியல் செவ்வாய்க்கிழமை வெளியிடப்பட்டது.

- 

இதில் 2.89 கோடி பேரின் பெயர்கள் இடம்பெறவில்லை. மாநிலத்தில் மொத்த வாக்காளர்கள் எண்ணிக்கை 15.44 கோடியில் இருந்து 12.55 கோடியாக குறைந்துள்ளது.வாக்காளர் பட்டியலில் இருந்து சட்டவிரோத குடியேறிகளின் பெயர்களை நீக்கும் நோக்கில், பிகாரில் கடந்த ஆண்டு வாக்காளர் பட்டியல் தீவிர திருத்தப் பணிகள் மேற்கொள்ளப்பட்டன. இரண்டாம் கட்டமாக, தமிழகம், கேரளம், மேற்கு வங்கம், உத்தர பிரதேசம், மத்திய பிரதேசம், குஜராத், ராஜஸ்தான், சத்தீஸ்கர், கோவா ஆகிய 9 மாநிலங்கள் மற்றும் புதுச்சேரி, அந்தமான்-நிகோபார், லட்சத்தீவு ஆகிய 3 யூனியன் பிரதேசங்களில் கடந்த நவ. 4-ஆம் தேதி எஸ்ஐஆர் பணிகள் தொடங்கின.

இந்த மாநிலங்கள் மற்றும் யூனியன் பிரதேசங்களில் மொத்த வாக்காளர்கள் சுமார் 51 கோடியாகும்.

தமிழகம், கேரளம், மேற்கு வங்கம், புதுச்சேரியில் விரைவில் பேரவைத் தேர்தல் நடைபெற உள்ள நிலையில், எதிர்க்கட்சிகளின் கடும் ஆட்சேபத்தையும் மீறி இந்தப் பணிகள் மேற்கொள்ளப்பட்டு, வரைவு வாக்காளர் பட்டியல் வெளியிடப்பட்டு வருகிறது.

தமிழகத்தில் அண்மையில் பட்டியலில் 97.28 லட்சம் பெயர்களும், மேற்கு வங்கத்தில் 58 லட்சம் பெயர்களும் நீக்கப்பட்டன.