போதைப் பொருள்கள் புழக்கத்தைத் தடுக்க அனைவரும் இணைந்து செயல்பட வேண்டும்

போதைப்பொருள் புழக்கத்தை முற்றிலும் தடுக்க மத்திய, மாநில அரசுகள் மட்டுமல்லாது அனைவரும் இணைந்து செயல்படவேண்டும் என்று முதல்வர் மு.க. ஸ்டாலின் கூறினார்.

- 

மதிமுக பொதுச் செயலர் வைகோ திருச்சியிலிருந்து மதுரைக்கு சமத்துவ நடைப்பயணத்தை திருச்சி அண்ணா நகர் உழவர் சந்தை திடலிலிருந்து வெள்ளிக்கிழமை தொடங்கினார். இந்த நடைப்பயணத்தை தொடங்கி வைத்து முதல்வர் மு.க. ஸ்டாலின் பேசியதாவது: தமிழகத்தில் மக்கள் பிரச்னைக்காக அதிக நடைப்பயணங்களை மேற்கொண்டவர் வைகோ. இளைஞர்களுக்கு நல்வழி காட்டுவதற்காக இளைஞர்களுடன் நடைப்பயணத்தை தொடங்கும் வைகோவுக்கு பாராட்டுகள்.

இளைஞர்களின் எதிர்காலத்தை சீரழிக்கின்ற போதைப் பொருள்களை நாம் நிச்சயம் ஒழிக்க வேண்டும். இதில் மாற்றுக்கருத்து இல்லை. போதையின் பாதையில் இருந்து இளைஞர்களை காப்பதற்காக தமிழக அரசு பல்வேறு நடவடிக்கைகளை எடுத்து வருகிறது. இதில் முழுமையாக இல்லாவிட்டாலும் ஓரளவேனும் பலன் கிடைத்திருக்கிறது. போதைப் பழக்கத்துக்கு அடிமையானவர்கள் அதன் பாதிப்புகளை உணர்ந்து அதிலிருந்து வெளியே வரவேண்டும். உடனிருப்பவர்கள் அவர்களைத் திருத்த வேண்டும்.