எண்மவழி சேவை... அடிப்படை உரிமை!

பாறப்புறத் இராதாகிருஷ்ணன்

- 

உலகம் முழுவதும் இன்று எண்மவழி (டிஜிட்டல்) சேவைகள் நாளுக்கு நாள் அதிகரித்து வருகின்றன. எண்மவழி சேவைகள் என்பது கணினிகள், இணையம், கைப்பேசி மற்றும் பிற மின்னணு தொழில்நுட்பங்களைப் பயன்படுத்தி மக்கள் பெறுகிற சேவைகளைக் குறிக்கிறது. இதில் பொதுமக்களுக்கான அரசு சேவைகள், வணிகம், வங்கிகளுடனான பணப் பரிவர்த்தனைகள், சமையல் எரிவாயு உருளைகளைப் பெறுதல், பயண வசதிகளை மேற்கொள்ளுதல் ஆகிய அனைத்து முறைமைகளும் அடங்கும்.

இந்த நிலையில், கண்ணைச் சிமிட்ட முடியாததால், வங்கிக் கணக்கு தொடங்க முடியாதவர்களும், பார்வைத் திறன் குறைபாடு உடையவர்களும் உச்சநீதிமன்றத்தில் தொடர்ந்த பொதுநல வழக்கின் மூலம், அனைத்து எண்ம (டிஜிட்டல்) வாய்ப்புகளும் பெறுவது என்பது மக்களின் அடிப்படை உரிமைகளில் ஒன்று என்று அதிமுக்கியத்துவம் வாய்ந்த உத்தரவை உச்சநீதிமன்றம் அண்மையில் பிறப்பித்துள்ளது.

ஜார்க்கண்ட் மாநிலம், தன்பாதைச் சேர்ந்த பிரக்யா பிரகன் என்பவர் அமில வீச்சால் பாதிக்கப்பட்டவர். தனியாக தொண்டு நிறுவனத்தைத் தொடங்கி, அமிலம் வீசப்பட்டதால் பாதிக்கப்பட்டவர்களுக்கு உதவிகளைச் செய்து வருகிறார். இவர் தனக்கென வங்கிக் கணக்கைத் தொடங்க முற்பட்டுள்ளார். 'உங்கள் வாடிக்கையாளரைத்தெரிந்து கொள்ளவும்' (கேஒய்சி) எனப்படும் வாடிக்கையாளர் குறித்த தகவல்களைப் பதிவு செய்யும்போது கண்ணை சிமிட்டும்படி அந்தத் தனியார் வங்கியில் கூறியுள்ளனர். ஆனால், அமிலம் வீசப்பட்டதால், முகச் சிதைவு ஏற்பட்டு, அவரால் கண்ணை சிமிட்ட முடியவில்லை. இதனால், வங்கிக் கணக்கை தொடங்க முடியவில்லை. தனது கைப்பேசிக்கு சிம் கார்டு வாங்கச் சென்ற போதும், இதே போன்ற அனுபவத்தை அவர் சந்திக்க நேர்ந்தது.