விருதுநகர் மாவட்டத்தில் 1,900 பேருக்கு வீடுகள் கட்ட ரூ.10.55 கோடி ஒதுக்கீடு

விருதுநகர் மாவட்டத்தில் கலைஞர் கனவு இல்லம் திட்டத்தின் கீழ், 1,900 பயனாளி களுக்கு வீடுகள் கட்ட ரூ.10.55 கோடி ஒதுக்கீடு செய்யப்பட்டுள்ளதாக வருவாய்துறை அமைச்சர் கே.கே.எஸ்.எஸ்.ஆர். ராமச்சந்திரன் தெரிவித்தார்.

- 

ஸ்ரீவில்லிபுத்தூர்/ராஜபாளையம், ஏப். 13:

ஸ்ரீவில்லிபுத்தூரில் கலைஞர் கனவு இல்லம் திட்டத்தின் கீழ் பயனாளிகள் வீடுகள் கட்டுவதற்கான ஆணை வழங்கும் விழா ஞாயிற்றுக்கிழமை நடைபெற்றது. இதற்கு மாவட்ட வருவாய் அலுவலர் ராஜேந்திரன் தலைமை வகித்தார். ஊரக வளர்ச்சி முகமைத் திட்ட இயக்குநர் தண்டபாணி வரவேற்றார்.

இதில் ஸ்ரீவில்லிபுத்தூர், வத்திராயிருப்பு வட்டங்களைச் சேர்ந்த 143 பயனாளிகளுக்கு கலைஞர் கனவு இல்லம் திட்டத்தின் கீழ் ரூ.5.05 கோடியில் வீடுகள் கட்டுவதற்கான ஆணையை வருவாய்துறை அமைச்சர் கே.கே.எஸ்.எஸ்.ஆர். ராமச்சந்திரன் வழங்கிப் பேசியதாவது:

ஆட்சிக்கு வருவது மட்டும் முக்கியமல்ல. ஆட்சி வரும் போகும். எதுவும் நிரந்தரமில்லை. ஆட்சியில் இருந்தாலும், இல்லாவிட்டாலும் மக்களைப் பற்றி சிந்தித்தவர் முன்னாள் முதல்வர் கருணாநிதி. அவரது ஆட்சியில்தான் இலவச வீட்டுமனைப் பட்டா வழங்கப்பட்டு, வீடுகள் கட்டும் திட்டம் தொடங்கப்பட்டது.