வல்லரசுகளும் இந்தியாவும்...

புதினுடனான சந்திப்பு விரும்பியபடி அமையாத நிலையில், இந்தியா மீதான வரிகள் பற்றிய கேள்விக்கு இரண்டு அல்லது மூன்று வாரங்கள் கழித்துதான் அதுகுறித்து யோசிக்க வேண்டும். தற்போது யோசிக்க வேண்டியதில்லை என டிரம்ப் கருத்துத் தெரிவித்துள்ளார்.

- கோதை ஜோதிலட்சுமி

இரு துருவங்களாக நிற்கும் வல்லரசுகளான அமெரிக்காவும் ரஷியாவும் ஒரிடத்தில் சங்கமித்தல் சாத்தியமா? என்ற வினாவுடனும் வியப்புடனும் உலகமே அமெரிக்க அதிபர் டிரம்ப், ரஷிய அதிபர் புதின் இருவரின் சந்திப்பை உற்று நோக்கியது. கடந்த ஆகஸ்ட் 15-ஆம் தேதி அலாஸ்காவில் நடைபெற்ற டிரம்ப்-புதின் சந்திப்பின் முடிவுகள் உலகத்தை அமைதி வழிக்குக் கொண்டுவர வேண்டும் என்று உலகம் எதிர்பார்த்தது.

ரஷியா-உக்ரைன் போரை முடிவுக்கு கொண்டுவர ஆக்கப்பூர்வமான பாதைக்கு இந்தப் பேச்சுவார்த்தை இட்டுச் செல்லும் என சந்திப்புக்கு முன்பு நம்பப்பட்டது. ஆனால், போர்நிறுத்தம் பற்றி எந்த ஒப்பந்தமும் எட்டப்படவில்லை; அமைதி ஒப்பந்தமும் அறிவிக்கப்படவில்லை.

அலாஸ்கா சந்திப்புக்குப் பிறகு டிரம்ப் பும் புதினும் கூட்டாக செய்தியாளர்களைச் சந்தித்தனர். ஆனால், இந்தப் பேச்சுவார்த்தையால் ஏற்பட்ட ஆக்கப்பூர்வமான விளைவுகள் குறித்து எந்தத் தகவலும் இல்லை. இருவரும் செய்தியாளர்களின் கேள்விகளுக்கும் பதிலளிக்கவில்லை.

அலாஸ்காவில் புதினுக்கு பிரம்மாண்ட வரவேற்பு அளிக்கப்பட்டது. சிவப்புக் கம்பள வரவேற்பு, ராணுவ சாகசம், நான்கு அமெரிக்கப் போர் விமானங்களின் பாதுகாப்பு, தனது வாகனத்திலேயே டிரம்ப் வரவேற்றது என சிறப்பான நிகழ்ச்சியாக அமைந்த இந்த சந்திப்பில் டிரம்ப் அடைந்தது யாது? என்ற கேள்வி எழுந்துள்ளது.

தான் பதவியேற்றதும் முதல் நாளிலேயே போரை முடிவுக்கு கொண்டு வருவதாக உறுதியளித்திருந்த டிரம்ப், தற்காலிக போர் நிறுத்தத்தை எட்டுவதில்கூட தோல்வியைச் சந்தித்துள்ளார் என்பதே உண்மை.

கடந்த பத்தாண்டுகளில் முதல்முறையாக ரஷிய அதிபர் அமெரிக்க மண்ணில் கால் பதித்துள்ளார். ஆனால், இந்த சந்திப்பில் ஏற்பட்டுள்ள ஒரே முடிவு 'அடுத்த முறை மாஸ்கோவில்' என புதின் கூறியிருப்பது மட்டும்தான். அலாஸ்காவில் நடைபெற்ற சந்திப்பில் என்ன விவாதிக்கப்பட்டது என யாருக்கும் தெரியாது; எந்த ஒப்பந்தமும் பொதுவெளியில் வைக்கப்படவில்லை.

மிகவும் எதிர்பார்க்கப்பட்ட டிரம்ப் - புதின் சந்திப்பு, உக்ரைன் போரில் அமைதியைக் கொண்டுவர மிக முக்கியமான நகர்வாகவும், பல குழப்பங்களுக்குப் பதிலளிக்கும் வகையிலும் அமையும் எனக் கருதப்பட்டது. ஆனால், இரு தலைவர்கள் இடையேயான மூன்று மணிநேர சந்திப்பு பதில்களைவிடவும் புதிய பல கேள்விகளையே எழுப்பியுள்ளது.