மருத்துவமனையிலிருந்து வீடு திரும்பினார் முதல்வர்

சென்னை அப்பல்லோ மருத்துவமனையில் சிகிச்சை பெற்றுவந்த முதல்வர் மு.க.ஸ்டாலின், ஞாயிற்றுக்கிழமை மாலை வீடு திரும்பினார்.

- 

சென்னை, ஜூலை 27:

கடந்த 21-ஆம் தேதி முதல்வர் ஸ்டாலின் நடைப்பயிற்சியில் ஈடுபட்டபோது, தலைசுற்றல் பாதிப்பு காரணமாக சென்னை கிரீம்ஸ் சாலையில் உள்ள அப்பல்லோ மருத்துவமனையில் அனுமதிக்கப்பட்டார். மருத்துவக் காரணங்களுக்காக ஓய்வில் இருக்க வேண்டும் என அறிவுறுத்தப்பட்டதையடுத்து, மருத்துவமனையில் இருந்தபடியே அரசுப் பணிகளை மேற்கொண்டு வந்தார்.

இதனிடையே, முதல்வருக்கு இதயத் துடிப்பு சீரற்று இருந்ததையடுத்து, அதைச் சீராக்குவதற்கான சிகிச்சை மேற்கொள்ளப்பட்டது. தொடர்ந்து மேற்கொள்ளப்பட்ட ஆஞ்சியோகிராம் பரிசோதனையில் முதல்வர் ஸ்டாலினுக்கு வேறு எந்தப் பாதிப்பும் இல்லை என மருத்துவமனை தரப்பில் தெரிவிக்கப்பட்டது.