பயங்கரவாதிகளும் பாதிக்கப்பட்டவர்களும் ஒன்றல்ல

'பயங்கரவாதத்துக்கு எதிராக சகிப்புத்தன்மையற்ற கொள்கையை இந்தியா கடைபிடித்து வருகிறது; பயங்கரவாதச் செயல்களில் ஈடுபடுவோரையும் அதனால் பாதிக்கப்பட்டோரையும் ஒருபோதும் இணையாக கருத முடியாது' என மத்திய வெளியுறவு அமைச்சர் எஸ்.ஜெய்சங்கர் சனிக்கிழமை தெரிவித்தார்.

- எஸ்.ஜெய்சங்கர்

புது தில்லி, ஜூன் 7:

இருநாள் பயணமாக சனிக்கிழமை இந்தியா வந்தடைந்த பிரிட்டன் வெளியுறவு அமைச்சர் டேவிட் லாமியுடனான ஆலோசனையின்போது அவர் இவ்வாறு தெரிவித்தார்.

ஆபரேஷன் சிந்தூரைத் தொடர்ந்து கடந்த மாதம் இந்தியா-பாகிஸ்தான் இடையே 4 நாட்கள் கடும் மோதல் நிகழ்ந்தது. அப்போது இருநாடுகளிடமும் அமெரிக்கா, சீனா, பிரிட்டன் உள்ளிட்ட நாடுகள் தனித்தனியே பேச்சுவார்த்தையில் ஈடுபட்டன. இந்தச் சூழலில் உலக நாடுகளுக்கு இந்தியாவின் நிலைப்பாட்டை எடுத்துரைக்கும் வகையில் டேவிட் லாமியிடம் ஜெய்சங்கர் பேச்சுவார்த்தை நடத்தினார்.

முன்னதாக, இந்தியா வந்தடைந்த டேவிட் லாமி பிரதமர் மோடியை சந்தித்தார். அதன்பிறகு டேவிட் லாமி தலைமையிலான பிரிட்டன் குழுவும் ஜெய்சங்கர் தலைமையிலான இந்திய குழுவும் இருதரப்பு உறவுகள் குறித்து ஆலோசனை நடத்தினர்.