மலையடிக்குப்பத்தில் ஜேசிபி மூலம் முந்திரி மரங்களை அழிக்க அதிகாரிகள் முயற்சி

மறியல் செய்து தடுத்து நிறுத்திய போராட்டக்குழுவினர்

- 

நெய்வேலி, ஜூலை 18: கடலூர் ஒன்றியம், வெள்ளக்கரை ஊராட்சி மலையடிக்குப்பம் கிராமத்தில் அரசு தரிசு நிலத்தில் விவசாயம் செய்து வரும் விவசாயிகளுக்கு பட்டா வழங்க வேண்டும் என வலியுறுத்தி தமிழ்நாடு விவசாயிகள் சங்கத்தினர் மூன்றாவது நாளாக வெள்ளிக்கிழமை தொடர் காத்திருப்பு போராட்டம் நடத்தி வரும் நிலையில், அப்பகுதியில் எஞ்சியுள்ள முந்திரி மரங்களை அழிப்பதற்காக கொண்டுவரப்பட்ட ஜேசிபி எந்திரத்தை போராட்டக்குழுவினர் மறியல் செய்து, முற்றுகையிட்டு தடுத்து நிறுத்தினர்.

மலையடிக்குப்பம் கிராமத்தில் 164 ஏக்கர் அரசு தரிசு நிலத்தில் கடந்த 5 தலைமுறையாக 300-க்கும் மேற்பட்ட குடும்பங்கள் விவசாயம் செய்து வாழ்ந்து வருகின்றனர். இவர்கள் பயிர் செய்து வரும் நிலப்பகுதிக்கு பட்டா வழங்க கோரி பல ஆண்டுகளாக மாவட்ட ஆட்சியர் மற்றும் தமிழ்நாடு அரசிற்கும் மனு அளித்தனர்.

இந்நிலையில், மாவட்ட நிர்வாகம் தொழிற்சாலை அமைப்பதற்காக அந்த நிலத்தில் சாகுபடி செய்திருந்த 9 ஆயிரம் முந்திரி மரங்களை ஜேசிபி எந்திரங்கள் மூலம் போலீஸார் பாதுகாப்புடன் அண்மையில் அழித்து அப்புறப்படுத்தியது. இது தொடர்பாக நீதிமன்றத்தில் வழக்கு தொடுக்கப்பட்டு முந்திரி மரங்களை அகற்ற இடைக்கால தடை பெறப்பட்டுள்ளது.