சிந்திக்கும் சமுதாயத்தை வளர்க்கும் என்எல்சி

அறிவுசார் மேம்பாட்டையும், சிந்திக்கும் சமுதாயத்தையும் வளர்க்கும் நோக்கில் புத்தகக் கண்காட்சியை நடத்தும் என்எல்சி நிறுவனத்தின் முன்முயற்சியை பாராட்டுவதாக, மத்திய நிலக்கரி அமைச்சகத்தின் துணை இயக்குநர் ஜெனரல் சந்தோஷ் அகர்வால் தெரிவித்தார்.

- 

நெய்வேலி புத்தகக் கண்காட்சியில் செவ்வாய்க்கிழமை நடைபெற்ற நிகழ்ச்சியில் வெளியிடப்பட்ட புத்தகத்துடன் முக்கியப் பிரமுகர்கள்.

நெய்வேலி, ஜூலை 8:

கடலூர் மாவட்டம், நெய்வேலியில் என்எல்சி இந்தியா நிறுவனம் நடத்தும் 24-ஆவது புத்தகக் கண்காட்சியின் 5-ஆம் நாள் விழா வட்டம் 11 பகுதியில் உள்ள பழுப்பு நிலக்கரி அரங்கில் செவ்வாய்க்கிழமை நடைபெற்றது.

நிகழ்ச்சிக்கு என்எல்சி நிறுவனத்தின் நிதித்துறை இயக்குநர் பிரசன்னகுமார் ஆச்சார்யா தலைமை வகித்துப் பேசியதாவது:

புத்தகங்கள் ஒருவரை இருளிலிருந்து ஒளிக்கு அழைத்துச் செல்கின்றன. சரியான நேரத்தில் சரியான புத்தகத்தைப் படிப்பது முன்னேற்றமடைய உதவும். புத்தகக் கண்காட்சிகள் மறைந்திருக்கும் திறமைகளைக் கண்டறிய உதவுகின்றன. புத்தகங்கள் கலங்கரை விளக்கம் என்றார்.