வெளிப்படைத்தன்மையுடன் பயிர் காப்பீட்டுத் தொகை

கிராமங்கள் தோறும் வெளிப்படைத்தன்மையோடு பயிர்க் காப்பீடு இழப்பீட்டுத் தொகை வழங்குவதை மாவட்ட நிர்வாகம் உறுதி செய்ய வேண்டும் என விவசாயிகள் வலியுறுத்தியுள்ளனர்.

- ஜி.சுந்தரராஜன்

சிதம்பரம், மார்ச் 30:

2024-2025 ஆண்டு பயிர்க் காப்பீட்டுத் திட்டத்தின் கீழ் விவசாயிகளுக்கு இழப்பீட்டுத் தொகை விடுவிக்கப்பட்டுள்ளது.

இதில், விவசாயிகளுக்கு வழங்கப்பட்டுள்ள இழப்பீட்டுத் தொகை விநியோகத்தில் வேறுபாடுகள் உள்ளதாகக் கூறப்படுகிறது. எனவே, பயிர்க் காப்பீட்டுத் திட்டத்தை வெளிப்படைத்தன்மையோடு செயல்படுத்த வேண்டும் என விவசாயிகள் கோரிக்கை விடுத்துள்ளனர்.

2016-ஆம் ஆண்டு முதல் திருத்தி அமைக்கப்பட்ட பாரதப் பிரதமரின் பசல் பீமா யோஜனா பயிர்க் காப்பீட்டுத் திட்டம் 2019-ஆம் ஆண்டு வரை மத்திய, மாநில அரசுகளின் பங்களிப்புடன் செயல்படுத்தப்பட்டது.

இந்த பயிர்க் காப்பீட்டுத் திட்டத்தில் 2016-ஆம் ஆண்டு முதல் கடுமையான வறட்சி, வெள்ளப் பாதிப்பு, அபரிமிதமான மழைப் பொழிவு போன்ற காரணங்களால் தமிழகத்தில் பாதிக்கப்பட்ட அனைத்து மாவட்ட விவசாயிகளுக்கும் இழப்பீட்டுத் தொகை வழங்கப்பட்டது.

இந்த நிலையில், லாப நோக்கத்துடன் திட்டத்தை செயல்படுத்த வந்த பல தனியார் பயிர்க் காப்பீட்டு நிறுவனங்கள் 2016-ஆம் ஆண்டு முதல் 2019 ஆண்டு வரை தமிழக விவசாயிகளுக்கு அதிக அளவில் இழப்பீடு கொடுத்ததால் நஷ்டமடைந்ததாக தெரிவித்தன.

மேலும், தமிழக விவசாயிகள் கூடுதல் இழப்பீட்டுத் தொகை கிடைக்கப் பெற்று பெருமளவில் பலன் அடைந்ததாகக் கூறி 2020, 2021 ஆகிய ஆண்டுகளில் மத்திய அரசு இந்தத் திட்டத்திலிருந்து விலகி புதிய வழிகாட்டுதலை வெளியிட்டது.