நாமக்கல் கால்நடை மருத்துவக் கல்லூரி வளாகத்தில் சிறை, தோல் தொழிற்சாலை அமைக்க நிலம் அளவீடு?

நாமக்கல் கால்நடை மருத்துவக் கல்லூரி பெருந்திட்ட வளாகத்தில் 200 ஏக்கர் பரப்பளவில் தோல் தொழிற்சாலை, மாவட்ட சிறைச்சாலை அமைக்க நிலம் அளவீடு செய்யும் நடவடிக்கையை வருவாய்துறை அதிகாரிகள் மேற்கொண்டு வருகின்றனர்.

- நமது நிருபர்

நாமக்கல், ஜூலை 4:

நாமக்கல் மாவட்டத்தில் ராசிபுரம், நாமக்கல், பரமத்திவேலூர் ஆகிய இடங்களில் கிளைச் சிறைகள் செயல்பட்டு வந்தன. இங்கு சிறிய குற்ற வழக்குகளில் தொடர்புடையோரை காவலில் வைத்திருப்பர். பெரிய குற்ற வழக்குகளில் தொடர்புடையோர் சேலம், கோவை மத்திய சிறைக்கு அழைத்துச் செல்லப்படுவர்.

அண்மையில் ராசிபுரம், பரமத்திவேலூர் கிளைச் சிறைகளை மூடுவதாக தமிழக அரசு அறிவித்துள்ளது. தற்போதைய நிலையில் 50 கைதிகளை அடைக்கும் வகையில் நாமக்கல் கிளைச் சிறை மட்டும் செயல்பாட்டில் உள்ளது. கடந்த மே மாதம் நடைபெற்ற சட்டப்பேரவைக் கூட்டத்தொடரில், நாமக்கல்லில் மாவட்ட சிறைச்சாலை ஏற்படுத்தப்படும் என்று அறிவிப்பு வெளியானது.

இதற்கான இடம் தேர்வு செய்யும் பணி கடந்த இரண்டு மாதங்களாக நடைபெற்று வந்தது. நாமக்கல்-கரூர் தேசிய நெடுஞ்சாலையில் ராசாம்பாளையம், குட்லாம் பாறை உள்ளிட்ட இடங்களை ஆய்வு செய்ததில் அவை சாலையை விட்டு சற்று தொலைவில் இருப்பதாகக் கூறப்பட்டது.

இதனால் 505 ஏக்கர் பரப்பளவு கொண்ட நாமக்கல் கால்நடை மருத்துவக் கல்லூரியில் காலி நிலத்தை அதிகாரிகள் பார்வையிட்டனர். அங்கு, நாமக்கல், கரூர் இரு மாவட்டத்தையும் சேர்ந்த சுமார் 250 கைதிகளை அடைக்கும் வகையில் சிறைச்சாலை அமைக்கத் திட்டமிடப்பட்டது. இதற்காக 25 ஏக்கர் நிலம் அண்மையில் வருவாய்துறையினரால் அளவீடு செய்யப்பட்டுள்ளதாகக் கூறப்படுகிறது.

தமிழக அரசுக்கு கருத்துரு அனுப்பப்பட்டு உரிய ஒப்புதல் கிடைத்தவுடன் சிறைச்சாலைக்கான கட்டுமானப் பணிகள் தொடங்கும் என எதிர்பார்க்கப்படுகிறது.