பிகார் வாக்காளர் பட்டியல் தீவிர திருத்தத்துக்கு எதிர்ப்பு: நாடாளுமன்ற வளாகத்தில் எதிர்க்கட்சிகள் கண்டன பேரணி

பிகாரில் தேர்தல் ஆணையம் மேற்கொண்டுள்ள வாக்காளர் பட்டியல் சிறப்பு தீவிர திருத்தப் பணிக்கு எதிர்ப்பு தெரிவித்து எதிர்க்கட்சிகளின் 'இண்டி' கூட்டணி எம்.பி.க்கள் நாடாளுமன்ற வளாகத்தில் கண்டனப் பேரணியை வெள்ளிக்கிழமை நடத்தினர்.

- 

புது தில்லி, ஜூலை 25:

அப்போது, 'சிறப்பு தீவிர திருத்தம்' என்று எழுதப்பட்ட தாள்களைக் கிழித்து, குப்பைத் தொட்டியில் போட்டு தங்களின் எதிர்ப்பை அவர்கள் பதிவு செய்தனர்.

காங்கிரஸ் தேசியத் தலைவர் மல்லிகார்ஜுன கார்கே, எதிர்க்கட்சித் தலைவர் ராகுல் காந்தி உள்பட 'இண்டி' கூட்டணிக்கட்சி எம்.பி.க்கள் பலர் இந்தப் போராட்டத்தில் பங்கேற்றனர். 'ஜனநாயகத்தை காப்போம்', 'வாக்குப் பறிப்பை நிறுத்து' உள்ளிட்ட முழக்கங்களை எழுப்பியபடி எம்.பி.க்கள் பேரணியை நடத்தினர்.

அப்போது, 'ஏழைகள், தலித்துகள், பழங்குடியினர், பின்தங்கிய பிரிவினர் மற்றும் சிறுபான்மையினரின் வாக்குகளை நீக்க மோடி அரசு விரும்புகிறது. அப்போதுதான், மனுஸ்மிருதியின் அடிப்படையில் இந்திய அரசமைப்புச் சட்டத்தை மாற்ற முடியும் என்பதே அவர்களின் நோக்கம்' என்று கார்கே குற்றஞ்சாட்டினார்.