மாட்டுத்தாவணி காய்கறிச் சந்தையில் சுகாதார வளாகம் செயல்பாட்டுக்கு வருமா?

மதுரை மாட்டுத்தாவணி தினசரி சந்தையில் உள்ள சுகாதார வளாகங்களைச் சீரமைத்து மக்கள் பயன்பாட்டுக்கு கொண்டு வர வேண்டும் என எதிர்பார்க்கப்படுகிறது.

- நமது நிருபர்

மதுரை, ஜூன் 17:

மதுரை மீனாட்சி சுந்தரேசுவரர் கோயில் அருகே செயல்பட்டு வந்த தினசரி காய்கறிச் சந்தையை இடமாற்றம் செய்வதற்காக, கடந்த 2010-ஆம் ஆண்டு மாட்டுத்தாவணியில் புதிய ஒருங்கிணைந்த வணிக வளாகம், நிரந்தர காய்கறிச் சந்தை கட்டுவதற்கு அனுமதி வழங்கப்பட்டது.

இதற்காக மத்திய அரசு ரூ.55 கோடி, மாநில அரசு ரூ.30 கோடி என மொத்தம் ரூ.85 கோடி நிதி ஒதுக்கீடு செய்யப்பட்டது. மேலும், காய்கறிச் சந்தை கட்டுவதற்கு மதுரை மாட்டுத்தாவணி பேருந்து நிலையம் அருகே 26 ஏக்கர் நிலம் தேர்வு செய்யப்பட்டது.

இந்தப் பகுதியில் வணிக வளாகம் கட்டுவதற்கு காலதாமதமாகும் என்பதால், வண்டியூர் கண்மாய் அருகே மாநகராட்சி சார்பில் சுமார் 12 ஏக்கர் பரப்பளவில் தற்காலிகச் சந்தைக்கான வணிக வளாகம் அமைக்கப்பட்டது. இங்கு 1,092 கட்டுமானக் கடைகளும், ஆயிரத்துக்கும் மேற்பட்ட தரைக் கடைகளும் அமைக்கப்பட்டன.