பாமகவுக்கு கைகொடுக்குமா வன்னியர் மாநாடு?

ன்னையை அடுத்த மாமல்லபுரம் திருவிடந்தையில் நடந்த சித்திரை முழுநிலவு பெருவிழா வன்னியர் இளைஞர் மாநாடு பாட்டாளி மக்கள் கட்சிக்கு (பாமக) அரசியல் ரீதியாக கைகொடுக்குமா என்பது விவாதப் பொருளாகியுள்ளது.

- பீ.ஜெபலின் ஜான்

பீ.ஜெபலின் ஜான்

12 ஆண்டுகளுக்குப் பிறகு இந்தமுறை பாமக தலைவர் அன்புமணி ராமதாஸ் தலைமையில் சுமார் 4 லட்சம் பேர் பங்கேற்ற மாநாடு பிரம்மாண்டமாக மாமல்லபுரத்தில் நடைபெற்றது. அடுத்த ஆண்டு பேரவைத் தேர்தல் நடைபெறவுள்ள நிலையில், இந்த மாநாடு மிகுந்த முக்கியத்துவம் பெறுகிறது.

சில மாதங்களுக்கு முன்பு தொடங்கிய ராமதாஸ், அன்புமணி இடையிலான பனிப்போர், இந்த மாநாட்டு மேடையில் மறைமுகமாக வெளிச்சமானது. மேடைக்கு வந்த ராமதாஸ், தனது மகள் வழி பேரனும், பாமக இளைஞர் அணித் தலைவராக தன்னால் நியமிக்கப்பட்ட வருமான முகுந்தனின் தோளை தாங்கியபடி வந்தார். இருப்பினும் மேடையில் அன்புமணியின் குடும்பத்தினருக்கு மட்டுமே முக்கியத்துவம் அளிக்கப்பட்டது.

மாநாட்டில் நீண்டநேரம் உரையாற்றிய அன்புமணியின் பேச்சில் திமுக எதிர்ப்பு நேரடியாகவும், அதிமுகவுடன் கூட்டணி செல்வதற்கான அறிகுறிகள் மறைமுகமாகவும் தென்பட்டன. ஆனால், குறைந்த நேரத்தில் சுருக்கமாக டாக்டர் ராமதாஸ் பேசியது அன்புமணி ஆதரவு நிர்வாகிகளுக்கு மறைமுக எச்சரிக்கை விடுக்கும்படியாக இருந்தது.

மாறிமாறி கூட்டணி: கூட்டணி அரசியலுக்குள் கால்பதித்த பாமக 1998-இல் அதிமுக கூட்டணியிலும், 1999-இல் திமுக கூட்டணியிலும் மக்களவைத் தேர்தலைச் சந்தித்தது. 2001 பேரவைத் தேர்தலில் அதிமுகவுடனும், 2004 மக்களவைத் தேர்தல் மற்றும் 2006 பேரவைத் தேர்தலில் திமுக கூட்டணி என மாறிமாறி கூட்டணி வைத்தாலும், தொடர்ந்து 10 ஆண்டுகளாக வெற்றி வளையத்தில் வலம்வந்தது.