இபிஎஸ் தலைமையில் அதிமுக - பாஜக கூட்டணி

2026 பேரவைத் தேர்தலை இணைந்து எதிர்கொள்ள முடிவு

- 

சென்னை, ஏப். 11: அதிமுக-பாஜக கூட்டணி உறுதியானதை மத்திய உள்துறை அமைச்சர் அமித் ஷா சென்னையில் வெள்ளிக்கிழமை அதிகாரபூர்வமாக அறிவித்தார்.

மேலும், அதிமுக பொதுச் செயலரும், எதிர்க்கட்சித் தலைவருமான எடப்பாடி கே.பழனிசாமி (இபிஎஸ்) தலைமையில் 2026 சட்டப்பேரவைத் தேர்தல் எதிர்கொள்ளப்படும் என்றும், இதற்காக குறைந்தபட்ச செயல்திட்டம் வகுக்கப்படும் என்றும் அவர் தெரிவித்தார்.

இதுதொடர்பாக சென்னையில் செய்தியாளர்களிடம் மத்திய அமைச்சர் அமித் ஷா கூறியதாவது: 2026 பேரவைத் தேர்தலை தேசிய ஜனநாயகக் கூட்டணி கட்சிகளுடன் இணைந்து சந்திப்போம். தேசிய அளவில் பிரதமர் மோடி தலைமையிலும், தமிழகத்தில் அதிமுக பொதுச்செயலர் எடப்பாடி பழனிசாமி தலைமையிலும் கூட்டணி செயல்படும்.

திமுக தனது ஊழல்களை மறைக்க சநாதன சர்ச்சை, மும்மொழி கொள்கை, தொகுதி வரையறை உள்ளிட்ட பிரச்னைகளை எழுப்பி வருகிறது.

ஊழல், சட்டம்-ஒழுங்கு சீர்குலைவு, தலித் மற்றும் பெண்கள் மீதான தாக்குதல்கள் உள்ளிட்டவைதான் இந்தப் பேரவைத் தேர்தலில் மிகப் பெரிய பேசுபொருளாக இருக்கும். இது குறித்து தமிழக மக்களுக்கு முதல்வர் மு.க.ஸ்டாலினும், துணை முதல்வர் உதயநிதி ஸ்டாலினும் பதில் சொல்ல வேண்டும்.