தயக்கம் வேண்டாம்...

உலக மக்களில் அதிகப்படியானோருக்கு பயம் என்பது எது என்றால் பலருக்கு முன்பாகப் பேசுவதுதான். இத்தகைய பயம் மாணவ, மாணவிகளிடையே மட்டுமின்றி பல்வேறு பணியில் இருப்பவர்களிடமும் இருக்கிறது.

- பெ. சுப்ரமணியன்

பலருக்கு முன்பு பேசத் தயங்கும் மாணவ, மாணவிகள்தான் வாய்மொழித் தேர்வு, தனியார் அல்லது அரசுப் பணிக்கான நேர்முகத் தேர்வு போன்றவற்றிலும் பேசத் தயங்குகின்றனர்.

வார்த்தைகள் வராதது, நன்றாகத் தெரிந்த நிகழ்வுகள் மறந்து போதல், தொடர்ச்சியாகப் பேச முடியாதது போன்றவையெல்லாம் பதற்றத்தின் வெளிப்பாடுகள்தான். அத்தகைய சூழ்நிலையிலிருந்து வெளியே வந்ததும் அனைத்து நிகழ்வுகளும் தெளிவாகத் தெரியும், பேச்சு கோர்வையாக வரும்.

அனைத்து தரப்பினரிடமும் இது போன்ற பிரச்னை இருந்து வருகிறது. இணைபிரியா தம்பதியர், நண்பர்கள், தோழிகள் என்று கூறுபவர்களை தனித்தனியே சந்தித்துப் பேசினால் தங்கள் மனக் குமுறல்களை வெளிப்படுத்துவர்.

சமூகத்தில் இவ்வகையானோர் எண்ணிக்கை நாளுக்கு நாள் அதிகரித்துக் கொண்டே வருகிறது.

சிக்கலான சூழல்கள், பிரச்னைகள் என்பது பெரும்பாலானோருக்கு வரக்கூடியவைதான். ஆனால், இன்றைய சூழலில் மட்டும் பிரச்னைக்கு உரியவர்கள் இப்படி ஏங்குவது ஏன்? சிறிய பிரச்னைகள்கூட ஏன் சிக்கலாக்கப்படுகின்றன என்றெல்லாம் கேள்விகள் எழலாம். இதற்கு மனம் விட்டுப் பேசாதது உள்ளிட்ட பல காரணங்கள் இருந்தாலும், குடும்ப அமைப்பு சிதறுண்டு போனதுதான் முக்கியக் காரணமாகும்.