தனியார் மருந்து நிறுவனத்தின் 15 லட்சம் பங்குகள் முடக்கம் அமலாக்கத் துறை நடவடிக்கை

சட்டவிரோத பணப் பரிமாற்றத்தில் ஈடுபட்டதாக தனியார் மருந்து நிறுவனத்தின் 15 லட்சம் பங்குகளை அமலாக்கத் துறை முடக்கியது.

- 

சென்னை, செப். 5:

சென்னையில் இயங்கும் ஒரு தனியார் மருந்து நிறுவனம் மீது பதியப்பட்ட சட்டவிரோத பணப்பரிமாற்ற வழக்குத் தொடர்பான ஆதாரங்களைத் திரட்டும் வகையில், சென்னையில் அந்த நிறுவனத்துக்கு தொடர்புடைய 10 இடங்களில் கடந்த 2-ஆம் தேதி ஒரே நேரத்தில் அமலாக்கத் துறையினர் சோதனையில் ஈடுபட்டனர். மேலும் மும்பை, கொல்கத்தா, கோவா ஆகிய இடங்களில் இச்சோதனை நடைபெற்றது.

இதுதொடர்பாக அமலாக்கத் துறை வியாழக்கிழமை வெளியிட்ட செய்திக் குறிப்பு: சென்னையைச் சேர்ந்த அரவிந்த் ரெமிடிஸ் நிறுவனத்தின் மீது சிபிஐ ரூ.637.58 கோடி வங்கிக் கடன் மோசடி செய்ததாக வழக்குப் பதிவு செய்து, விசாரணை செய்தது. இந்த வழக்கு விசாரணையில் சட்டவிரோத பணப்பரிமாற்றத்துக்கான முகாந்திரம் இருந்ததால், அமலாக்கத் துறை விசாரணைக்கு பரிந்துரை செய்யப்பட்டது.