ஜெர்மனி நிறுவனங்கள் மேலும் ரூ.3,819 கோடி முதலீடு

ஜெர்மனியில் தமிழ்நாடு அரசின் சார்பில் நடைபெற்ற முதலீட்டாளர் மாநாட்டில் மேலும் ரூ.3,819 கோடிக்கான புரிந்துணர்வு ஒப்பந்தங்கள் முதல்வர் மு.க.ஸ்டாலின் முன்னிலையில் கையொப்பமிடப்பட்டன.

- 

சென்னை, செப். 2:

தமிழ்நாட்டுக்கு முதலீடுகளை ஈர்க்கும் நோக்கில், ஜெர்மனி, பிரிட்டன் நாடுகளுக்கு முதல்வர் மு.க.ஸ்டாலின் பயணம் மேற்கொண்டுள்ளார். ஏற்கெனவே ரூ.3,201 கோடி முதலீட்டுக்கு ஜெர்மன் நிறுவனங்களுடன் மூன்று ஒப்பந்தங்கள் செய்யப்பட்ட நிலையில், மேலும் 23 புரிந்துணர்வு ஒப்பந்தங்கள் திங்கள்கிழமை கையொப்பமிடப்பட்டன.

9,070 புதிய வேலைவாய்ப்புகள்:

புதிதாக மேற்கொள்ளப்பட்ட புரிந்துணர்வு ஒப்பந்தங்கள் மூலமாக, 9,070 பேருக்கு வேலைவாய்ப்புகள் கிடைக்கும். முதல்வரின் ஜெர்மனி பயணத்தால், ஒட்டுமொத்தமாக ரூ.7,020 கோடிக்கு முதலீடுகள் ஈர்க்கப்பட்டு, அதனால் 15,320 பேருக்கு வேலைவாய்ப்புகள் உருவாகும் சூழல் ஏற்பட்டுள்ளது.

இதுகுறித்து தமிழக அரசின் சார்பில் வெளியிடப்பட்ட செய்தி: முதல்வர் மு.க.ஸ்டாலின் முன்னிலையில் செய்யப்பட்ட ஒப்பந்தங்களில் சில முக்கியமானவையாகும். அதாவது, வென்சிஸ் எனர்ஜி (ரூ.1,068 கோடி - 5,238 பேருக்கு வேலை), பிஏஎஸ்எஃப் (ரூ.300 கோடி - 100 பேருக்கு வேலை), பெல்லா பிரீமியர் ஹேப்பி ஹைஜீன் (ரூ.300 கோடி முதலீடு - 200 பேருக்கு வேலை), ஹெர்ரென்க்னெக்ட் இந்தியா (ரூ.250 கோடி - 400 பேருக்கு வேலை), பல்ஸ் (ரூ.200 கோடி - 500 பேருக்கு வேலை), விட்சென்மேன் இந்தியா (ரூ.200 கோடி முதலீடு - 450 பேருக்கு வேலை), மாஷ் எனர்ஜி (ரூ.200 கோடி முதலீடு - 200 பேருக்கு வேலை) ஆகியன பிரதானமான புரிந்துணர்வு ஒப்பந்தங்களாக கருதப்படுகின்றன.