சுருங்கும் வாழ்விடம் கேள்விக்குறியாகும் யானைகளின் பாதுகாப்பு!

காட்டு யானைகளைக்காக்க மேற்கு, கிழக்குத் தொடர்ச்சி மலைப் பகுதியில் புல் வகைகள், மரங்களைப் பாதுகாக்க வேண்டும் என சமூக ஆர்வலர்கள் வலியுறுத்துகின்றனர்.

- எஸ்.பாண்டி

பெரியகுளம், ஆக. 10:

தமிழகத்தில் ஆனைமலை, முதுமலை, சத்தியமங்கலம், களக்காடு, ஸ்ரீவில்லிபுத்தூர் ஆகிய இடங்களில் உள்ள புலிகள் காப்பகங்கள், கோவை, ஈரோடு, தருமபுரி, வேலூர் வனக் கோட்டங்கள், வன உயிரினச் சரணாலயங்கள் உள்ளிட்ட பகுதிகளில் சுமார் 2,800-க்கும் மேற்பட்ட யானைகள் உள்ளன.

தற்போது, நாட்டில் 12 மாநிலங்களில் சுமார் 35 ஆயிரம் யானைகள் இருப்பதாகக் கூறப்படுகிறது. யானைகள் அழிவுக்கு அவற்றின் வாழ்விடம் சுருங்குதல், விவசாயத்துக்கு காடுகளைச் சீரமைத்தல், வேட்டையாடுதல் ஆகியவை முக்கியக் காரணங்களாக உள்ளன.

யானைக்கு தினசரி 150 கிலோ பசுந்தீவனங்களும், 100 லி. தண்ணீரும் தேவை. உணவுத் தேவையை நிறைவு செய்ய யானைகள் ஆண்டுதோறும் 300 முதல் 400 சதுர கி.மீ. தொலைவு பயணிக்கின்றன. பருவநிலைக்கு ஏற்ப தங்களது வாழ்விடங்களை யானைகள் மாற்றுகின்றன.

யானைகள் பாதுகாப்புக்காக பல்வேறு நடவடிக்கைகளை தமிழக அரசு எடுத்து வந்தாலும், இவற்றின் மீதான தாக்குதல்களும், இதனால் ஏற்படும் இறப்புகளும் அதிகரித்து வருகின்றன.