தலைவர்கள் இரங்கல்

பழம்பெரும் நடிகை சரோஜா தேவிக்கு மறைவுக்கு ஆளுநர், முதல்வர், பல்வேறு அரசியல் கட்சித் தலைவர்கள் இரங்கல் தெரிவித்துள்ளனர்.

- 

சென்னை, ஜூலை 14:

ஆளுநர் ஆர்.என்.ரவி: மொழி மற்றும் காலத்தைக் கடந்து, இந்திய சினிமாவில் ஒரு அழியாத அடையாளத்தை விட்டுச் சென்றவர் நடிகை சரோஜா தேவி. அவரது மறைவால் ஆழ்ந்த வருத்தம் அடைந்தேன். திரைப்படத் துறையில் காலத்தால் அழியாத அவரது பங்களிப்புகள் ஒரு பொற்காலத்தை வடிவமைத்து, பல தலைமுறைகளுக்கும் அது பிரதிபலிக்கின்றன. அவரது குடும்பத்தினருக்கும், ரசிகர்களுக்கும் எனது நெஞ்சார்ந்த இரங்கல்.

தமிழக முதல்வர் மு.க.ஸ்டாலின்: நடிகை சரோஜா தேவி மறைந்த செய்தி அறிந்து மிகவும் வேதனை அடைந்தேன். தமிழகத்தின் உச்ச நடிகர்களான சிவாஜி, எம்.ஜி.ஆர், ஜெமினி உள்ளிட்ட பலருடன் இணைந்து நடித்தார். அவரது படங்கள் மறக்க முடியாதவை. அழகிய முக பாவங்களாலும், நளினமான நடிப்பாலும் அபிநய சரஸ்வதி எனப் புகழப்பட்டவர்.

திரையுலகுக்கு ஆற்றிய பங்களிப்புகளுக்காக பத்ம விருதுகளையும், இந்திய அரசின் வாழ்நாள் சாதனையாளர் விருது, தமிழ்நாடு அரசின் கலைமாமணி விருது என எண்ணற்ற பெருமைகளைப் பெற்றவர். அவரை இழந்து வாடும் குடும்பத்தினர், திரைத் துறையினர், ரசிகர்கள் உள்பட அனைவருக்கும் ஆழ்ந்த இரங்கல்.