தருமபுரி மாவட்ட ஆட்சியரகத்தில் ரூ. 36.62 கோடியில் கூடுதல் கட்டடம்

தருமபுரி மாவட்ட ஆட்சியரகத்தில், ரூ. 36.62 கோடியில் அமைக்கப்பட்ட கூடுதல் கட்டடத்தை, தமிழக முதல்வர் மு.க. ஸ்டாலின் காணொலிக் காட்சி வாயிலாக திங்கள்கிழமை திறந்துவைத்தார்.

- 

தருமபுரி, ஜூலை 7:

ஒருங்கிணைந்த சேலம் மாவட்டத்திலிருந்து தருமபுரி 1965 ஆம் ஆண்டு அக்டோபர் 2 ஆம் தேதி தனி மாவட்டமாக உதயமானது. இதையடுத்து மாவட்ட ஆட்சியரகத்தை 1967 ஆம் ஆண்டு ஆகஸ்ட் 26 ஆம் தேதி, அப்போதைய முதல் அமைச்சர் சி.என். அண்ணாதுரை தருமபுரியில் திறந்துவைத்தார். இதைத்தொடர்ந்து காலத்துக்கேற்ற வகையில், 2005, 2008, 2009 ஆம் ஆண்டுகளில், நவீன வசதிகளுடன் கூட்ட அறை, மேலும் சில கட்டடங்கள், நவீன வசதிகள், நுழைவாயில் என பல்வேறு பணிகள் மேற்கொள்ளப்பட்டன. என்றாலும் கூடுதல் இட வசதியுடன் புதிய கட்டடம் அமைக்க நடவடிக்கை மேற்கொள்ளப்பட்டது.

தமிழக முதல்வர் மு.க. ஸ்டாலின் அனைத்து நவீன வசதிகளுடன் கூடிய கூடுதல் அலுவலகக் கட்டடம் தருமபுரி மாவட்ட ஆட்சியரகத்தில் அமைக்கப்படும் என, தருமபுரியில் 20.1.2022 அன்று நடைபெற்ற அரசு விழாவில் அறிவித்திருந்தார். அதன்படி, தருமபுரி மாவட்ட ஆட்சியர் அலுவலக வளாகத்தில் 4.25 ஏக்கர் நிலப்பரப்பில், 36.62 கோடியில் தரை மற்றும் ஐந்து தளங்களுடன் புதிய கட்டடம் கட்டும் பணிகள் முடிவடைந்து திறப்புக்கு காத்திருந்தது.