காஷ்மீரில் பயங்கரவாதிகளுக்கு எதிரான வேட்டை தீவிரம்

3 நாள்களில் 6 பேர் சுட்டுக் கொலை

- 

அவந்திபோரா, மே 16: பஹல்காம் தாக்குதலுக்குப் பிறகு ஜம்மு-காஷ்மீரில் பயங்கரவாதிகளுக்கு எதிராக தீவிர வேட்டை தொடர்ந்து வருகிறது.

பாதுகாப்புப் படையினர் கடந்த மூன்று நாள்களில் மேற்கொண்ட இரு முக்கிய நடவடிக்கைகளில் 6 பயங்கரவாதிகள் சுட்டுக் கொல்லப்பட்டனர். இவர்களில், பல்வேறு தாக்குதல்களில் தொடர்புடைய ஷாஹீத்குட்டே என்ற பயங்கரவாதி யும் அடங்குவார்.

தெற்கு காஷ்மீரின் அனந்த்நாக் மாவட்டத்தில் உள்ள சுற்றுலாத் தலமான பஹல்காமில் கடந்த ஏப்ரல் 22-ஆம் தேதி பயணிகள் மீது பயங்கரவாதிகள் நடத்திய துப்பாக்கிச் சூட்டில் 26 பேர் கொல்லப்பட்டனர். முஸ்லிம் அல்லாத ஆண்களைக் குறிவைத்து நடந்த இத்தாக்குதலுக்கு பழிதீர்க்க, பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் ஆபரேஷன் சிந்தூர் மூலம் பயங்கரவாத உள்கட்டமைப்புகளை இந்திய ராணுவம் கடந்த மே 7-ஆம் தேதி மிகத் துல்லியமாக தாக்கி அழித்தது.

மற்றொரு புறம், ஜம்மு-காஷ்மீரின் பல்வேறு பகுதிகளில் பயங்கரவாதிகள், அவர்களின் கூட்டாளிகளுக்கு எதிராக தீவிர வேட்டை தொடர்ந்து வருகிறது.