சேக்கிழார் சுவாமிகளின் நாட்டுப்பற்று

முனைவர் விமலா அண்ணாதுரை

- 

சிவபெருமானின் பெருமைகளையும் அவரை வழிபட்டு உய்ந்த சிவனடியார்களின் பெருமைகளையும், அழகாக எடுத்துக் கூறும் புராணம் பெரியபுராணம் ஆகும். சேக்கிழார் சுவாமிகள் 'பக்திச் சுவை நனிசொட்டச் சொட்ட' பாடிய இப்புராணத்துக்கு சிவபெருமானே, உலகெலாம் என்று அடியெடுத்துக்கொடுத்ததாக இப்புராணத்தின் சிறப்பை ஆன்றோர் போற்றிப் புகழ்கின்றனர்.

சைவத்தின் மேன்மையைப் பாட விருப்பம் கொண்ட சேக்கிழார் பெருமானுக்குத் தமிழின் பெருமை, தமிழ்நாட்டின் மேன்மையையும் பாட வேண்டுமென்ற விருப்பம் இருந்திருக்கிறது என்பது பெரிய புராணத்தின் வாயிலாக அறியக்கூடியதாக இருக்கிறது.

வடநாட்டுக்குச் சென்று கயிலை மலையில் வீற்றிருக்கும் சிவபெருமானைத் தரிசிப்பது முக்திக்கு வழிவகுக்குமென்ற கொள்கையிலும் சுவாமிகளின் மனம் அதிகம் ஒன்றியதாகத் தெரியவில்லை. அவரது நாட்டுப் பற்று அதற்கு இடங் கொடுக்கவுமில்லை. தமிழ்நாடு எல்லா வகையிலும் சிறப்புடையதென்பதே அவரது புராணத்தின் அடிநாதமாக இருக்கிறது.

நமிநந்தி அடிகளின் கனவிலே சிவபெருமான் தோன்றி, 'திருவாரூரில் பிறந்தவர்கள் எல்லோரும் தேவ கணங்களே' என்று கூறுவது திருவாரூரின் சிறப்பைக் கூறும் ஒன்று.

திருநாவுக்கரசு நாயனார் புராணத்திலே, திருநாவுக்கரசர், கயிலைமலை நோக்கிச் செல்லும் காட்சியை மிக அற்புதமாகக் காட்டுகிறார் சேக்கிழார் சுவாமிகள்.

முதுமையின் கொடுமையால் நடக்க முடியாமல் தவழ்ந்து செல்கிறார் அப்பர். இரவு பகலாக விடாமுயற்சியுடன் தவழ்ந்து, தவழ்ந்து கயிலைமலை யாத்திரையை மேற்கொள்கிறார் நாவுக் கரசர்.