பயங்கரவாத முகாம்களை ஒழிக்க நடவடிக்கை

அனைத்துக் கட்சி கூட்டத்தில் ஒருமித்த ஆதரவு

- 

புது தில்லி, ஏப். 24: பயங்கரவாத முகாம்களை ஒழிக்க உறுதியான நடவடிக்கை எடுப்பதற்கு அனைத்துக் கட்சிக் கூட்டத்தில் எதிர்க்கட்சிகள் ஒருமித்த ஆதரவளித்ததாக மத்திய அமைச்சர் கிரண் ரிஜிஜு தெரிவித்தார்.

ஜம்மு-காஷ்மீரின் பஹல்காமில் கடந்த செவ்வாய்க்கிழமை நடைபெற்ற பயங்கரவாத தாக்குதலில் 26 பேர் கொல்லப்பட்டனர். தாக்குதலில் ஈடுபட்ட பயங்கரவாதிகள் அடையாளம் காணப்பட்டு, அவர்களைத் தேடும் பணி தீவிரப்படுத்தப்பட்டுள்ளது.

இத்தாக்குதலின் எல்லை தாண்டிய பயங்கரவாத தொடர்புகளைக் கருத்தில் கொண்டு, பாகிஸ்தானுக்கு எதிராக கடுமையான ராஜீய நடவடிக்கைகளை மத்திய அரசு மேற்கொண்டு வருகிறது.

இச்சம்பவத்தையொட்டி பிரதமர் நரேந்திர மோடி தலைமையிலான பாதுகாப்பு விவகாரங்களுக்கான மத்திய அமைச்சரவைக் குழு புதன்கிழமை (ஏப்.23) கூடியது.

சிந்து நதி நீர் பகிர்வு ஒப்பந்தம் நிறுத்தம், வாகா எல்லை மூடல், பாகிஸ்தானியர்களுக்கு விசா (நுழைவு இசைவு) ரத்து, பரஸ்பர தூதரக பாதுகாப்பு அதிகாரிகள் வெளியேற்றம் போன்ற முக்கிய முடிவுகள் அந்தக் கூட்டத்தில் எடுக்கப்பட்டன.

தொடர்ந்து, பாகிஸ்தானும் இந்தியாவுக்கு எதிராக சில நடவடிக்கைகளை அறிவித்ததால் பதற்றமான சூழல் நிலவுகிறது.

இந்நிலையில், அனைத்துக் கட்சிக் கூட்டம் தில்லியில் ராஜ்நாத் சிங் தலைமையில் வியாழக்கிழமை (ஏப்.24) நடைபெற்றது.