யாழ் இனிது!

இலக்கிய குவியலுக்கு இடையிலே யாழின் நாண்களைச் சரியாக மீட்டு, 2,500 ஆண்டுகளுக்குப் பிறகு யாழ் இசைக்கருவியை மீட்டுருவாக்கம் செய்திருக்கிறார் மதுரையைச் சேர்ந்த இருபத்து எட்டு வயதான இளைஞர் தருண்சேகர்.

- -ந. முத்துமணி

இவர் சென்னை கோடம்பாக்கத்தில் உள்ள தனது 'உரு இன்ஸ்ட்ருமென்ட்ஸ்' என்ற நிறுவனம் வாயிலாக, அந்தக் கருவியைத் தயாரித்து வருகிறார்.

அவரிடம் பேசியபோது:

எனது சொந்த ஊரான மதுரையில் பத்தாம் வகுப்பு படிக்கும்போது, 'ஹவாய் கிடார்' இசைக்கருவியின் மீது ஈர்ப்பு வந்தது. அந்தக் கருவி இந்தியாவில் எங்கும் கிடைக்கவில்லை. 'யூடியூப்' வாயிலாகச் சொந்தமாக வடிவமைத்தேன். சொந்தமான இசைக்கருவியை வடிவமைத்து, அதில் இருந்து புறப்படும் ஒலியைக் கேட்டபோது உற்சாகம் துள்ளியது.

வடிவமைப்பை பயில, ஓசூர் அதியமான் பொறியியல் கல்லூரியில் கட்டடக் கலையை கற்றேன். கோடை விடுமுறைக்கு ஊருக்குச் செல்லும்போதெல்லாம், பஞ்சோ, உக்குலேலே போன்ற நாண்கருவிகளைச் சொந்தமாக உருவாக்கினேன்.

மாணவர் பயிற்சி முகாமுக்காக, புதுச்சேரி ஆரோவில் சென்றபோது, கிடார் போன்ற கம்பி இசைக்கருவிகள் தயாரிப்பில் ஈடுபட்டிருந்த 'எரிஸா நியோகி' என்பவரை சந்தித்தேன்.

நான் வடிவமைத்த இசைக்கருவிகளை அவரிடம் காண்பித்தபோது, அதைப் பாராட்டிய நியோகி ஆறு மாதங்கள் இசைக்கருவி வடிவமைப்பு தொடர்பாக பயிற்சியை எனக்கு அளித்தார். இது எனக்குள் புத்துணர்வை ஏற்படுத்தியது.

படிப்பை முடித்தவுடன் இசைக்கருவிகளை உருவாக்குவதற்காகவே வாழ்நாளை ஒப்படைக்க முடிவு செய்தேன். இந்திய இசைக் கருவிகளை உலகத் தரத்தில் உருவாக்க முடிவு செய்து, 2019-இல் 'உரு இன்ஸ்ட்ருமென்ட்ஸ்' என்ற நிறுவனத்தைத் தொடங்கினேன்.

மேற்கு வங்கத்தைச் சேர்ந்த வீணையை மறு உருவாக்கம் செய்ய திட்டமிட்டிருந்தேன். கீழடி ஆய்வில் ஈடுபட்டு, அதன் கட்டடக்கலையை ஆவணப்படுத்தி வந்த எனது நண்பர் சிவா, பழந்தமிழர் இசைக்கருவியான 'யாழ்' பற்றித் தெரிவித்தபோது, அதை ஆராயத் தொடங்கினேன். அன்றைய சந்தையில் இசைக்கக் கூடிய 'யாழ்' கருவி இல்லை என்பதை உணர்ந்து அதிர்ச்சி அடைந்தேன்.