அரசின் தலைமைப் பொறுப்பு: 25-ஆம் ஆண்டில் பிரதமர் மோடி!

'வளர்ந்த இந்தியா இலக்கை எட்ட தொடர்ந்து பணியாற்றுவேன்'

- 

குஜராத் முதல்வர்-நாட்டின் பிரதமர் என அரசின் தலைமைப் பொறுப்பில் 25ஆவது ஆண்டில் செவ்வாய்க்கிழமை (அக்.7)அடியெடுத்துவைத்தார் பிரதமர் நரேந்திர மோடி.

கடந்த 2001-இல் இதே நாளில் குஜராத் முதல்வராக முதல் முறையாகப் பதவியேற்ற மோடி, 2014.

மே மாதம் நாட்டின் பிரதமராகி, தொடர்ந்து மூன்றாவது முறையாக அப்பதவியில் நீடித்து வருகிறார். அரசின் தலைவர் என்ற முறையில் மோடியின் 25-ஆம் ஆண்டு தொடங்கியுள்ளது.

'மக்களின் வாழ்வை மேம்படுத்த தொடர்ந்து பெருமுயற்சி மேற்கொண்டுள்ளேன்; வளர்ந்த பாரதம் இலக்கை எட்ட வரும் காலங்களில் மேலும் கடினமாகப் பணியாற்றுவேன்' என்று பிரதமர் கூறியுள்ளார்.

குஜராத்தின் மெஹ்சனா மாவட்டத்தில் உள்ள சிறிய நகரான வத்நகரில் சாதாரண குடும்பத்தில் கடந்த 1950, செப்டம்பர் 17-ஆம் தேதி பிறந்தவர் பிரதமர் மோடி. ஆர்எஸ்எஸ் பிரசாரக பயணத்தைத் தொடங்கியதில் இருந்து நாட்டின் பிரதமரானது வரை அவரது அரசியல் பயணம் நீண்ட நெடியதாகும்.