இறுதிச்சுற்றில் அல்கராஸ் - ரூன் பலப்பரீட்சை

ஸ்பெயினில் நடைபெறும் பார்சிலோனா ஓபன் டென்னிஸ் போட்டியின் இறுதிச்சுற்றில், உள்நாட்டு நட்சத்திரம் கார்லோஸ் அல்கராஸ் - டென்மார்க்கின் ஹோல்கர் ரூன் ஆகியோர் ஞாயிற்றுக்கிழமை பலப்பரீட்சை நடத்துகின்றனர்.

- 

முன்னதாக அரையிறுதியில், போட்டித் தரவரிசையில் முதலிடத்தில் இருக்கும் அல்கராஸ் 6-2, 6-4 என்ற நேர் செட்களில், 7-ஆம் இடத்திலிருந்த பிரான்ஸின் ஆர்தர் ஃபில்ஸை வீழ்த்தினார். போட்டித் தரவரிசையில் 6-ஆம் இடத்திலிருக்கும் டென்மார்க்கின் ஹோல்கர் ரூன் 6-3, 6-2 என்ற நேர் செட்களில் ரஷியாவின் காரென் கச்சனோவை தோற்கடித்தார்.

இறுதிச்சுற்றில் மோதும் அல்கராஸ் - ரூன் இதுவரை 3 முறை சந்தித்திருக்க, அதில் அல்கராஸ் 2 வெற்றிகள் பெற்றிருக்கிறார். கடைசியாக 2023 விம்பிள்டன் காலிறுதியில் மோதியபோதும் அல்கராஸ் வென்றிருக்கிறார்.