உதகையில் துணைவேந்தர்கள் மாநாடு: தன்கருக்கு ஆளுநர் ஆர்.என்.ரவி அழைப்பு

நீலகிரி மாவட்டம், உதகையில் உள்ள ஆளுநர் மாளிகையில் ஏப். 25 முதல் 27-ஆம் தேதி வரை மாநில பல்கலைக்கழகங்களின் துணைவேந்தர்கள் மாநாடு நடைபெறுகிறது.

- 

கோவை, ஏப். 19:

இதில் குடியரசு துணைத் தலைவர் ஜகதீப் தன்கர் சிறப்பு அழைப்பாளராகப் பங்கேற்க அவருக்கு ஆளுநர் ரவி அழைப்பு விடுத்துள்ளதாகத் தெரியவந்துள்ளது.

தமிழக ஆளுநராக ஆர்.என்.ரவி 2021-ஆம் ஆண்டு செப்டம்பரில் நியமிக்கப்பட்டார். இதைத் தொடர்ந்து பல்கலைக்கழகங்களின் வேந்தர் என்ற அடிப்படையில 2022-முதல் ஆண்டுதோறும் துணைவேந்தர்கள் மாநாட்டை உதகையில் உள்ள ஆளுநர் மாளிகையில் ஆளுநர் ரவி நடத்தி வருகிறார்.

இந்த மாநாட்டில் தமிழ்நாட்டில் உள்ள 48 மத்திய, மாநில அரசுப் பல்கலைக்கழகங்கள், தனியார் பல்கலைக்கழகங்களின் துணைவேந்தர்கள் பங்கேற்று வருகின்றனர். மாநிலப் பல்கலைக்கழகங்களின் இணைவேந்தரான தமிழக உயர் கல்வித் துறை அமைச்சரின் பங்கேற்பின்றி இதுவரை நடந்த மாநாட்டில் பங்கேற்பதா, வேண்டாமா என்ற தயக்கம் தொடக்கம் முதலே மாநிலப் பல்கலைக்கழகங்களின் துணைவேந்தர்களுக்கு இருந்து வந்தது.

ஆனாலும் மாநில அரசிடம் இருந்து வெளிப்படையாக எந்தவொரு எதிர்ப்பும், கருத்தும் வெளிவராததால் ஆண்டுதோறும் துணைவேந்தர்கள், துணைவேந்தர் பொறுப்பில் இருப்பவர்கள் மாநாட்டில் பங்கேற்று வருகின்றனர்.