முர்ஷிதாபாத் வன்முறையைத் தூண்டியது பாஜக, பிஎஸ்எஃப்

மேற்கு வங்கத்தின் முர்ஷிதாபாதில் நிகழ்ந்த வன்முறை ஏற்கெனவே திட்டமிடப்பட்டது; இதை பாஜகவும் எல்லைப் பாதுகாப்புப் படையின் (பிஎஸ்எஃப்) ஒரு பிரிவும் தூண்டிவிட்டன என்று மேற்கு வங்க முதல்வர் மம்தா பானர்ஜி குற்றஞ்சாட்டியுள்ளார்.

- 

முஸ்லிம்கள் அதிகம் வசிக்கும் முர்ஷிதாபாத் மாவட்டத்தில் வக்ஃப் திருத்தச் சட்டத்துக்கு எதிராக கடந்த சில நாள்களுக்கு முன்பு நடைபெற்ற போராட்டம் பெரும் வன்முறையாக வெடித்தது.

வன்முறைக் கும்பலால் தந்தை-மகன் கொலை செய்யப்பட்டனர். காவல் துறை வாகனங்கள் உள்பட பொது சொத்துகள் சூறையாடப்பட்டன. வீடுகள், கடைகளுக்கு தீவைப்பு, கல்வீச்சு சம்பவங்களும் நிகழ்ந்தன. காவல் துறை துப்பாக்கிச் சூட்டில் ஒருவர் உயிரிழந்தார். இதைத் தொடர்ந்து மேற்கு வங்கத்தின் தெற்கு 24 பர்கானாக்கள் மாவட்டத்திலும் வன்முறை ஏற்பட்டது.