நீட் தேர்வு விவகாரம்: முதல்வர்-எதிர்க்கட்சித் தலைவர் கடும் விவாதம்

நீட் தேர்வு விவகாரம் தொடர்பாக முதல்வர் மு.க.ஸ்டாலின், எதிர்க்கட்சித் தலைவர் எடப்பாடி கே.பழனிசாமி இடையே பேரவையில் வெள்ளிக்கிழமை கடும் விவாதம் நடைபெற்றது.

- 

ஆளுநர் உரை மீதான விவாதத்தில் எதிர்க்கட்சித் தலைவர் எடப்பாடி பழனிசாமி பேசியது: 4 ஆண்டுகளாகச் செய்தது தான் ஆளுநர் உரையில் குறிப்பிடப்பட்டுள்ளது. புதிதாக எதுவும் இல்லை. தேர்தல் நேரத்தில் கொடுத்த வாக்குறுதிகள் எதையும் திமுக நிறைவேற்றவில்லை. திமுக ஆட்சிக்கு வந்ததும் நீட் தேர்வு ரத்து செய்யப்படும் என்று வாக்குறுதி கொடுக்கப்பட்டது. நீட் தேர்வு 4 ஆண்டுகளாக நடந்துள்ளது. நீட் தேர்வில் தமிழகம் விதிவிலக்கு பெறுமா என்று மக்கள் கேட்கின்றனர் என்றார்.

அப்போது முதல்வர் மு.க.ஸ்டாலின் குறுக்கிட்டு கூறியது: திமுக ஆட்சிக்கு வந்தால், நீட் தேர்வை ரத்து செய்வோம் என்று வாக்குறுதி அளித்தோம். 'இந்தியா' கூட்டணி ஆட்சிக்கு வந்தால் நீட் தேர்வை ரத்து செய்வோம் என்று ராகுல் காந்தியும் கூறினார். ஆனால், 'இந்தியா' கூட்டணி ஆட்சிக்கு வரவில்லை. நீங்கள் பாஜகவுடன் கூட்டணியில் இருந்தபோது, நீட் தேர்வை ரத்து செய்திருக்கலாம். ஆனால், செய்யவில்லை. இப்போதும் சொல்கிறேன். நீட் தேர்வை ரத்து செய்ய முயற்சிப்போம்.

எடப்பாடி பழனிசாமி: 2010-இல் நீட் தேர்வு வருவதற்கான அறிவிப்பாணை வந்தது. அப்போது மத்தியில் எந்த ஆட்சி (காங்கிரஸ்) இருந்து என்பது அனைவருக்கும் தெரியும். அந்தக் கூட்டணியில் திமுகவும் இடம் பெற்றிருந்தது. மத்திய மக்கள் நல்வாழ்வுத் துறை இணையமைச்சராக இருந்தவர் திமுகவை சேர்ந்த காந்திச்செல்வன்.