உலகப் பெருந்தமிழர் நல்லகண்ணு!

இந்தியாவின் வடக்கே உள்ள கான்பூரில், 26 டிசம்பர் 1925-இல் இந்திய கம்யூனிஸ்ட் கட்சி தொடங்கப்பட்டது. அதே நாளில் இந்தியாவின் தென்கோடியான தமிழ்நாட்டில் திருவைகுண்டம் அருகே உள்ள பெரும்பத்து என்னும் கிராமத்தில் தோழர் இரா. நல்லகண்ணு பிறந்தார்.

- 

தமிழரான சிங்காரவேலர் தலைமையில இந்திய கம்யூனிஸ்ட் கட்சி 1925-ஆம் ஆண்டு தொடங்கி வைக்கப்பட்டது. அதன் நூற்றாண்டு விழா நடைபெறும் இவ்வாண்டில் அக்கட்சியின் பொதுச் செயலாளராகத் தமிழரான தோழர் டி. இராசா திகழ்வதும், தமிழ்நாட்டில் அக்கட்சியை வளர்த்தெடுத்த தியாகச் செம்மல்களில் ஒருவரான இரா. நல்லகண்ணு அவர்களின் நூற்றாண்டு விழா நடைபெறுவதும் தற்செயலானது அல்ல; அல்லவே அல்ல; வரலாறு பதித்த என்றும் அழியாத முத்திரை தடயங்களாகும்.

பள்ளிப் பருவத்தில் பாரதியின் பாடல்களில் உள்ளத்தைப் பறிகொடுத்த இரா. நல்லகண்ணு, இளமைப் பருவத்தில் வ.உ. சிதம்பரனார், சத்தியமூர்த்தி மற்றும் பல தேசியத் தலைவர்களின் சொற்பொழிவுகளைக் கேட்டும், பகத் சிங் போன்ற மாபெரும் புரட்சி வீரர்களின் வரலாறுகளைப் படித்தும் தனது நாட்டுப் பற்றை வளர்த்துக் கொண்டார். நாளுக்குநாள் அவரது உள்ளத்தில் தேசப் பற்று தீப்பற்றி எரிந்தது. இதன் விளைவாக, கல்லூரிப் படிப்பை பாதியில் நிறுத்திவிட்டு 1946-ஆம் ஆண்டில் மக்களுக்காகத் தொண்டாற்றும் மனிதநேய வாழ்வைத் தேர்ந்தெடுத்தார்.

1947-ஆம் ஆண்டு மே தின விழாவிற்காக நான்குநேரி வட்டாரத்தில் விவசாயிகளை ஒன்றுதிரட்டி வெற்றிகரமாக விழா நடத்தியதைக் கண்டு வெகுண்டெழுந்த நில உடைமையாளர்கள் ஏவிய குண்டர்களால் தாக்கப்பட்டு முதன்முதலாக ரத்தம் சிந்தி தியாகத் தழும்பை ஏற்றார்.