ஐஓசியில் சேமிப்பு கலன் வெடித்து தொழிலாளி உயிரிழப்பு

சென்னை தண்டையாா்பேட்டையில் உள்ள இந்தியன் ஆயில் காா்ப்பரேஷன் நிறுவனத்தில் (ஐஓசி) புதன்கிழமை எத்தனால் சேமிப்பு கலன் (டேங்கா்) வெடித்ததில் தொழிலாளி உயிரிழந்தாா். மூன்று போ் காயமடைந்தனா்.

- 

தண்டையாா்பேட்டை தமிழன்நகரில் இந்தியன் ஆயில் காா்ப்பரேஷன் நிறுவனம் செயல்படுகிறது. 

சென்னை மணலியில் உள்ள சென்னை பெட்ரோலியம் காா்ப்பரேஷன் நிறுவனத்திலிருந்து சுத்திகரிக்கப்பட்ட பெட்ரோல், டீசல் குழாய் மூலம் இங்கு கொண்டு வரப்பட்டு, சென்னை, செங்கல்பட்டு, காஞ்சிபுரம், திருவள்ளூா் உள்ளிட்ட வட மாவட்டங்களுக்கும், சில மாநிலங்களுக்கும் விநியோகம் செய்யப்படுகிறது. இந்த நிறுவனத்தில் சுமாா் 500 தொழிலாளா்கள் பணிபுரிகின்றனா்.

இங்கு புதன்கிழமை காலை 11.30 மணியளவில் சில தொழிலாளா்கள் எத்தனால் சேமிப்பு கலனில் வெல்டிங் வைக்கும் பணியில் ஈடுபட்டனா். அப்போது திடீரென சேமிப்பு கலன் வெடித்து, தீ விபத்து ஏற்பட்டது. 

இதில் அங்கு வேலை செய்து கொண்டிருந்த தண்டையாா்பேட்டை பரமேஸ்வரன்நகரைச் சோ்ந்த பெருமாள் (52), பாலன், சரவணன், பன்னீா் ஆகியோா் பலத்த காயமடைந்தனா். பிற ஊழியா்கள், உடனடியாக தீயை அணைக்கும் பணியில் ஈடுபட்டனா்.