பிரிந்த கணவன் மீண்டும் அழைக்கிறார் தவிக்கும் மனைவி!

அன்புள்ள டாக்டர், நான் 38 வயது பெண். எனக்கு 26 வயதில் திருமணமானது. அடுத்த இரு ஆண்டுகளில் அடுத்தடுத்து இரண்டு குழந்தைகள் ஒரு மகன், ஒரு மகள் என வாய்த்தனர். என் கணவர் சுயமாகத் தொழில் செய்து வருகிறார். என் அண்ணன்கள் மூவர், அப்பா என எங்கள் குடும்பத்தில் எல்லோருமே சுயதொழில்தான்.

- 

என் கணவர் என் மீது அன்பாகவே இருந்தார். ஆனால், விதி கொடூரமாக என் வாழ்வில் விளையாடியது. எனக்கு என் மகள் பிறந்த அடுத்த வருடமே கழுத்து பெரிதாக வீங்கத் தொடங்கியது. என்னவென்று போய் பரிசோதித்துப் பார்த்த போது, தைராய்டு புற்றுநோய் என்றார்கள். என் உலகமே இருண்டுவிட்டது.

என் கணவர் ரிசல்ட் வந்ததில் இருந்தே என்னிடம் சரிவரப் பேசாமல் முகம் இருண்டுபோய் அமைதியாக இருந்தார். நானும் அவர் அப்செட்டாக இருக்கிறார் என்று நினைத்து அமைதியாக வீட்டுக்கு வந்தேன். என் மாமியாரிடம் என் கணவரேதான் விஷயத்தைச் சொன்னார். குழந்தைகளுக்கு இப்போதைக்குத் தெரிய வேண்டாம் என்று நினைத்தேன். ஆனால், என் மாமியார் சொல்லிவிட்டார்.

அவர்களுக்குப் புரியாவிட்டாலும் அம்மாவுக்கு ஏதோ உடல்நிலை சரியில்லை என்று நினைத்து எனக்கு ஆறுதல் சொன்னார்கள். நான் வெடித்து அழுதேன். அப்போது முதலே என் மாமியாரின் சுடுசொல் என்னை வாட்டத் தொடங்கியது. கேன்சர் இருக்கும் பெண்ணை ஏமாற்றிக் கட்டி வைத்து, என் மகன் வாழ்வை நாசமாக்கிவிட்டார்கள் என்றெல்லாம் வாய்க்கு வந்ததை எல்லாம் பேசினார்.

எனக்கு ஆறுதலாக இருப்பார் என்று நினைத்த என் கணவரோ என் அண்ணன்களிடமும் அப்பாவிடமும் சண்டையிட்டார். ஒரு நோயாளியை எனக்கு திருமணம் செய்துவைத்துவிட்டீர்கள். இந்தக் குழந்தைகளை இனி எப்படிப் பார்த்துக்கொள்வேன். ஒருவேளை எதிர்காலத்தில் இவர்களுக்கும் இந்த நோய் வந்தால் என் சந்ததியே இல்லாமல் போய்விடுமே. என்னை இப்படி ஏமாற்றிவிட்டீர்களே என்று சத்தமிட்டார்.