Adam yn y Sioe Frenhinol

BYDD garddwr teledu poblogaidd yn gosod ei sgil yn erbyn tyfwyr eraill yn sioe amaethyddol fwyaf Cymru lle bydd yn gwisgo tair het wahanol.

- 

Bydd Adam Jones, un o gyflwynwyr y gyfres S4C, Garddio a Mwy, hefyd yn cael ei gadw'n brysur fel cyfarwyddwr anrhydeddus yr adran arddwriaeth yn y Sioe Frenhinol yn Llanelwedd, adran a gafodd ei hadfywio ganddo y llynedd.

Yn ogystal â hynny, bydd hefyd ar y sgrin ar gyfer rhifyn arbennig y rhaglen o'r Sioe Fawr ochr yn ochr â'i gyd-gyflwynwyr, Meinir Gwilym a Sioned Edwards, a fydd yn cael ei darlledu am 8.25pm nos Lun, Gorffennaf 28.

Mae'r garddwr adnabyddus o Gorslas, ger Llanelli, yn wyneb a llais cyfarwydd ar ôl ymddangos yn rheolaidd ar raglenni BBC Radio Cymru ac S4C Prynhawn Da a Heno ac mae hefyd wedi ymddangos ar raglen BBC2 Gardeners World.

Yn ystod y blynyddoedd diwethaf mae wedi datblygu dilyniant mawr ar gyfryngau cymdeithasol gyda dros 26,000 o ddilynwyr ar Instagram (@adamynyrardd).

Yn y sioe eleni, bydd yn mentro ei enw da trwy gystadlu mewn sawl dosbarth yn yr adran garddwriaethol.

Mae Adam yn cyfaddef ei fod braidd yn nerfus am y canlyniad a bydd gwylwyr yn gallu darganfod sut hwyl mae'n ei gael yn ystod y rhaglen sy'n cael ei chynhyrchu gan y cwmni teledu o Gaernarfon, Cwmni Da.

Dywedodd: “Dw i ddim yn gwybod sut hwyl y bydda i'n ei gael oherwydd dyma'r tro cyntaf i mi roi fy enw i mewn. Un peth yw tyfu ffrwythau, llysiau a blodau ond mae'n beth hollol wahanol tyfu rhywbeth a fydd yn dal llygad y beirniaid ac yn ennill tystysgrif goch enwog y dosbarth cyntaf.

“Rwyf wedi cystadlu mewn dosbarthiadau ar gyfer pys pêr a pelargoniums sydd ymhlith y gwobrau mwyaf poblogaidd yn y sioe ynghyd â dosbarth ffrwythau meddal. Rwyf hefyd wedi rhoi fy enw i mewn i'r dosbarth ar gyfer arddangosfa o bump o lysiau gwahanol ond dw i ddim yn gwybod pa lysiau fydda i'n dod â nhw i Lanelwedd eto,” meddai.