BIKTIMANG PINATAY AT NINAKAWAN, SALARIN 'DI PA RIN TUKOY

Sa pamamagitan ng "out-of-court identification," ipinakita umano ng mga pulis ang larawan nina Alexander, Danny at Modesto na mula sa kanilang rogue gallery. Agad naman nilang kinumpirma ang tatlong nabanggit na may kagagawan ng pamamaslang at pagnanakaw.

- 

Mariin namang pinabulaanan ng mga inakusahan na sina Alexander, Danny at Modesto ang mga paratang laban sa kanila.

Batay sa testimonya ni Modesto, siya ay nasa bahay ng kanyang kapatid at nag-aalaga sa kanyang mga pamangkin noong petsa ng insidente. Bayaw niya umano si Danny na nasa trabaho rin noong araw na iyon. Wala umano siyang alam tungkol sa kaso na isinampa laban sa kanila.

Ipinaliwanag din niya na siya at si Danny ay naaresto noong ika-12 ng Agosto 2017, bunsod ng paratang na attempted robbery na naganap sa ibang lugar. Bagaman kilala niya umano si Bienvenido na may-aring isang tindahan, hindi niya umano kilala si Alexander.

Batay naman sa testimonya ni Danny, siya ay nasa Bani, Pangasinan noong araw ng insidente bilang isang stay-in na trabahador sa sakahan ng isang nagngangalang Sheryl.

Diumano, mula pa Mayo 2017 ay namamasukan na siya sa nasabing sakahan hanggang matapos ang anihan. Matapos ang kanyang pamamasukan sa naturang sakahan ay nakakuha naman umano siya ng trabaho sa Sual, Pangasinan. Ika-21 ng Setyembre 2017 nang siya'y maaresto sa Sual bunsod ng alegasyon na pagmamay-ari ng baril at motorsiklo. Sa himpilan ng pulis na umano niya napag-alaman ang ukol sa paratang na robbery with homicide na inihain laban sa kanila.

Kilala lamang niya umano si Alexander dahil nakasama niya at ni Modesto ito noong sila ay makulong sa Burgos, Pangasinan, subalit sila ay napalaya na noon pang Mayo 2017.

Kilala rin lamang niya umano si Bienvenido bilang isang negosyante, dahil ang kanilang mga tirahan ay mula sa tatlo hanggang apat na raang metro ang pagitan at mararating ng mga labinlimang minuto sa pamamagitan ng lakad.

Ayon naman kay Alexander, siya ay nasa Madella, Quirino noong araw ng insidente. Meron diumanong reklamo na theft laban sa kanya sa korte roon at nakalaya lamang siya sa bisa ng piyansa noong ika-22 ng Agosto 2017. Dumiretso na umano siya agad sa bahay ng kanyang ina sa Bamban Sur, Infanta.