కాసులకోసం బరితెగింపు..

• కట్టెల పొయ్యిపై వండుతూ.. • గ్యాస్ పై వండుతున్నట్లు నకిలీ బిల్లులు..

- 

• కట్టెల పొయ్యిపై వండుతూ..

• గ్యాస్ పై వండుతున్నట్లు నకిలీ బిల్లులు..

• సాంఘిక సంక్షేమ శాఖలో శృతిమించుతున్న మనీ డాన్లు..

• గ్యాస్ ఏజెన్సీలకు టోకరా... నకిలీ బిల్లులతో కోట్లు స్వాహా..

• ప్రత్యేక ఉద్యోగితో బిల్లుల నిర్వహణ..

• అత్యవసర సహాయ నిధులు సైతం మాయం..

• మాట వినని ఉద్యోగులపై వేధింపులు..

• ఖమ్మం జిల్లాలో కళ్ళు అవినీతి దందా..

ఖమ్మం, 01 ఆగస్టు ( ఆదాబ్ హైదరాబాద్ ) : సాంఘిక సంక్షేమ శాఖలో మనీ డాన్ల వ్యవహారం రోజు రోజుకు శృతిమించి పోతోంది.. కాసుల కోసం అడ్డగోలుగా ప్రభుత్వ నిబంధనలను పాతి పెడుతున్నారు.. సంపాదనే ధ్యేయంగా విధులు నిర్వహిస్తూ పసిపిల్లల నోటి కాడ కూడును కాసులుగా మార్చుకొని, కోట్లకు పడిగెత్తుతూ పబ్బం గడుపుతున్నారు. అందివచ్చిన ప్రతి అవకాశాన్ని సద్వినియోగం చేసుకోవడంలో వీరికి మించిన ఘనాపాటీలు ఎవరూ లేనంత విధంగా బరితెగిస్తున్నారు. వసతి గృహాల్లో విద్యార్థుల సంరక్షణ, ఆరోగ్య పరిరక్షణ కోసం ప్రభుత్వం కోట్లాది రూపాయలు నిధులు మంజూరు చేస్తున్నా అవి ఎక్కడా సద్వినియోగం కావడం లేదు. దయ, జాలి, కరుణ లేకుండా విద్యార్థులకు అందాల్సిన నిధులను చాకచక్యంగా స్వాహా చేస్తూ అక్రమార్జన చేస్తున్నారు.. క్షేత్రస్థాయి నుండి జిల్లా స్థాయి వరకు వీరు చేస్తున్న వ్యవహారాల్లో జిల్లా అధికారులు కూడా పాలుపంచుకోవడం, వారి అండదండలు పుష్కలంగా ఉండడంతో సాంఘిక సంక్షేమ శాఖలో మనీ డాన్ల వ్యవహారం మూడు పువ్వులు ఆరు కాయలుగా విరాజిల్లుతుంది