આ ટ્રેન્ડનો અર્થ સમજો...

ચૂંટણી અને એનાં પરિણામની અનિશ્ચિતતાના માહોલમાં શૅરબજારમાં રોકાણ માટે સેન્ટિમેન્ટ કંઈક અંશે ડગુમગુ થઈ રહ્યું છે. જો કે આ શૉર્ટ ટર્મ તબક્કો ગણાય. બાકી, જેમને લોન્ગ ટર્મ રોકાણ કરવું છે એમના માટે શૅરબજાર અને મ્યુચ્યુઅલ ફંડ એ બન્ને માર્ગ ઉમદા હોવાનું નિષ્ણાતો માને છે.

- જયેશ ચિતલિયા

ચૂંટણી પરિણામની પ્રતીક્ષામાં અત્યારે શૅરબજારમાં સતત વૉલેટિલિટીના ટ્રેન્ડ સાથે માર્કેટમાં અમુક અંશે અનિશ્ચિતતા ફેલાઈ રહી છે. આની અસર હાલ ટૂંકા ગાળાની છે, જો કે પરિણામ પછી એની લાંબા ગાળાની અસર જોવા મળશે. આ સંજોગો વચ્ચે શૅરબજારના ટ્રેન્ડ માટે આશાનું મહત્ત્વનું કિરણ એ છે કે સ્થાનિક સંસ્થાઓનું રોકાણ સતત વધતું રહી અત્યારે એ ફોરેન પોર્ટફોલિયો ઈન્વેસ્ટર્સ (એફપીઆઈ)ની સમકક્ષ પહોંચી ગયું છે. ભારતીય રિટેલ બચતકાર-રોકાણકાર વર્ગ આની નોંધ લઈને ભાવિ શક્યતા અને સફળતાનો અંદાજ લગાવી શકે છે.

આ વખતના એપ્રિલમાં સ્થાનિક સંસ્થાકીય રોકાણનું પ્રમાણ પ્રથમ વાર ફોરેન પોર્ટફોલિયો ઈન્વેસ્ટર્સ કરતાં વધુ નોંધાયું છે. આ સ્થાનિક સંસ્થાકીય રોકાણકારોમાં મ્યુચ્યુઅલ ફંડ્સ, બૅન્કો, વીમા કંપનીઓ અને નાણાસંસ્થાઓ સામેલ છે. એપ્રિલમાં એમનું કુલ ઈક્વિટી રોકાણ ૬૬.૭ લાખ કરોડ રૂપિયા પર પહોંચી ગયું છે. આ જ ગાળામાં ફોરેન પોર્ટફોલિયો ઈન્વેસ્ટર્સનું રોકાણ ૬૬.૩ લાખ કરોડ રૂપિયા જેટલું છે. આમ સ્થાનિક-લોકલ અને ગ્લોબલ રોકાણકારોનાં ઈક્વિટી ઈન્વેસ્ટમેન્ટ લેવલ એકસમાન થઈ ગયાં કહી શકાય.