ચૂંટણી લડો, પણ ઔચિત્ય જાળવીને...

કોઈ પણ મુકાબલામાં સામસામી આક્રમકતા હોય એમાં ખોટું નથી, પણ આ સરહદે ખેલાતું યુદ્ધ નથી. અહીં મારો-કાપો ન હોવું જોઈએ. પરિણામ જાહેર થઈ ગયા પછી પણ વેરભાવ રહે એવો માહોલ પેદા કરવાનું દેશ માટે જ નુકસાનકારક બની શકે.

- હીરેન મહેતા

નવી લોકસભા માટેના મતદાનના એક પછી એક તબક્કા પૂરા થઈ રહ્યા છે એમ ચૂંટણીપ્રચાર વધુ ને વધુ ઝેરીલો બની રહ્યો છે. આપણા રાજકારણીઓ પાસેથી હવે આમ પણ વિવેકની અપેક્ષા રાખવી ભૂલભરેલી છે અને એમાં પણ ચૂંટણીના દિવસોમાં તો રાજકીય આગેવાનો ભાન ભૂલીને બફાટ કરવા માટે પંકાઈ ગયા છે. થાય છે એવું કે એમાં પછી મર્યાદાનો સાવ જ લોપ થઈ જાય છે.

ભાજપ અને કોંગ્રેસ: શબ્દોનાં બાણ ક્યારે અટકશે?

૨૦૧૯ની લોકસભા ચૂંટણીના થોડા મહિના અગાઉ જમ્મુ-કશ્મીરના પુલવામા શહેર નજીક અર્ધલશ્કરી દળોના કાફલા પર આતંકી હુમલો થયો અને એમાં ૪૦ જવાન શહીદીને વર્યા ત્યારે વિપક્ષોએ મોદી સરકારે જ મતદારોની સહાનુભૂતિ મેળવવા આ હુમલો કરાવ્યો હોવાનું આળ મૂક્યું હતું. એના પ્રતિસાદ રૂપે ભારતીય વાયુસેનાએ સીમા પાર કરી એનાં વિમાન મોકલી પાકિસ્તાનમાં કેટલીક આતંકી છાવણી ધ્વસ્ત કરી એને પણ કેટલાક વિપક્ષી નેતાઓએ ઈલેક્શન સ્ટન્ટ ગણાવ્યું હતું.

ફરી ચૂંટણી આવી અને જાણે ઈતિહાસનું પુનરાવર્તન થતું હોય એમ હમણાં ફરી કશ્મીરમાં સુરક્ષાદળના કાફલા પર હુમલો થયો. આ વખતે જાનહાનિ ઓછી થઈ, પણ વિપક્ષોને ફરી એક વાર મોદી સરકાર પર ચૂંટણી વખતનું નાટકનો આક્ષેપ કરવાનો મોકો મળી ગયો. પહેલાં પંજાબના ભૂતપૂર્વ મુખ્ય મંત્રી ચરણજિત સિંહ ચન્નીએ આ મુદ્દો ઉખેળ્યો અને એ પછી ફારુક અબદુલ્લાથી માંડી બિહારના તેજપ્રતાપ યાદવ સુધીના આગેવાનોએ એનો એ જ મુદ્દો રગદોળ્યા કર્યો. ચૂંટણીપ્રચારને કોઈ બહુ ગંભીરતાથી લેતું નથી એટલે રાજકારણીઓ પણ ઔચિત્ય ચૂકી જવાની દરકાર રાખતા નથી.