વાહનોની ભુલભુલામણીમાં તમારી કાર કે બાઈક ખોવાઈ જાય ત્યારે..

WhatsAppમાં ઉમેરાયેલું સ્ક્રીન શૅરિંગનું આ નવું ફીચર આજકાલ ખૂબ જ જાણીતું થયું છે.

- પુનીત આચાર્ય સોમપુરા

ડિજિટલ દુનિયાના વાચકમિત્રોએ પૂછેલા અને અમે ચૂંટેલા કેટલાક પ્રશ્નોના ઉત્તર આ સાથે પ્રસ્તુત છે...

પ્રશ્નઃ હું ઘણી વાર પાર્ક કરેલા મારા વાહનનું લોકેશન ભૂલી જાઉં છું. એનો કોઈ ઉપાય સૂચવશો?

 ઉત્તરઃ પાર્ક કરેલા વાહનનું એક્ઝેક્ટ લોકેશન ભૂલી જવાનો પ્રશ્ન તમારો એકનો નહીં, પણ બીજા લાખો લોકોનો છે. અહીં જ બાઈક પાર્ક કરી હતી, કોઈ ચોરી ગયું કે શું? જેવો હૃદયને ખળભળાવતો ધ્રાસકો લગભગ દરેકે કોઈક ને કોઈક વાર તો અનુભવ્યો જ હશે.

આના ઉપાય માટે તમે મોબાઈલમાં FIND MY CAR કૅટેગરીની કોઈ પણ ઍપ ઈન્સ્ટૉલ કરી શકો છો. આમાં ધ્યાન એ રાખવું પડે છે કે તમે વાહન પાર્ક કરો એ જ સમયે આ ઍપ ખોલીને તમારા વાહનનું લોકેશન ઍપમાં ફ્રીઝ કરી દેવાનું હોય છે, જેથી પાછા ફરતી વખતે એક્ઝેક્ટ તમારા જ વાહન સુધી ઍપ તમને દોરી લાવી શકે.

બીજું એક સોલ્યુશન છે બ્લુટૂથ ટ્રૅકરનું. નાની કી-ચેન જેવું આ ડિવાઈસ તમે કારમાં અથવા સ્કૂટરની ડિકીમાં મૂકી દો. એની સાથે કનેક્ટ થતી ઍપને તમારા સ્માર્ટફોનમાં ઈન્સ્ટૉલ કરી લો. હવે જ્યારે વાહનનું પાર્કિંગ ક્યાં કર્યું છે એ ભૂલી જાવ ત્યારે ઍપ ખોલો. જુઓ, છે ને તમારા વાહન સુધી પહોંચવાનો રસ્તો હાજરાહજૂર? આવું જ એક બીજું ટ્રૅકર પણ માર્કેટમાં ઉપલબ્ધ છે, જે GPS TRACKER તરીકે ઓળખાય છે.