પ્રેમની પરિભાષા સમજાવે છે આ પ્રેમીપરિવાર

બે તદ્દન અલગ વ્યક્તિની ભિન્ન પ્રકૃતિનો સ્વીકાર, એનો આદર, એકબીજા પ્રત્યે સમજણ અને લાગણી... આ જ તો છે પ્રેમ. જીવન સાથે જીવવા માટે પ્રેમની આટલી વ્યાખ્યા જ પૂર્ણ છે. પ્રેમની આ થિયરી સાથે જ અગ્રવાલપરિવાર રહે છે. નવાઈની વાત તો એ છે કે આ પરિવારમાં દરેક યુગલનાં પ્રેમલગ્ન છે. જ્ઞાતિ-રિવાજોથી ઉપર ઊઠીને સંબંધમાં બંધાનારા આ કુટુંબ માટે પ્રેમ અઢી અક્ષરના શબ્દથી કંઈક વિશેષ છે.

- હેતલ રાવ (અમદાવાદ)

બોલો, પ્રેમરોગ ચેપી કે વારસાગત હોઈ શકે?

આમ તો પ્રેમ કોઈ બીમારી જ નથી. એ તો લાગણીની કૂણી કૂણી અને ઘણી વાર અવ્યક્ત રહી જતી અનુભૂતિ છે. માનવામાં ના આવતું હોય તો કોઈ પણ પ્રેમીપાત્રને પૂછી જો જો. સામે કોઈ એક વ્યક્તિ એવી મળી જાય, જેને જોઈને હૃદયના તાર ઝણઝણી ઊઠે અથવા તો એક ગીતની જેમ દિલમાં ઘંટડી વાગવા લાગે એ પ્રેમ.

 આવી લાગણીને ચેપી વ્યાધિ કઈ રીતે કહી શકાય?

 જો કે અમદાવાદના એક પરિવારને મળો તો ખરેખર માનવું જ પડે કે હા, પ્રેમનો રોગ વારસાગત છે, એ પેઢી-દર પેઢી ઊતરી આવે છે.

અમદાવાદમાં રહેતા અગ્રવાલપરિવારમાં પ્રેમલગ્ન જાણે એક પરંપરા બની ગયાં છે. આ કુટુંબમાં ત્રણ પેઢીથી બધાંએ પ્રેમલગ્ન જ કર્યાં છે. કુટુંબના મોભી રાજ કિશોર અગ્રવાલ કે એમનાં પત્ની લીલાવતી અત્યારે હયાત નથી, પણ વર્ષો અગાઉ એ બન્નેએ પ્રેમલગ્ન કર્યાં હતાં. એ સમયે કોઈ પોતાની પસંદગીનાં લગ્ન કરવાનું તો દૂર, પણ પોતાનાં લગ્ન વિશે વાત કરતાં પણ ખચકાટ અનુભવતા. જો કે પોતાના નિર્ણય પર કાયમ રહી રાજ કિશોરભાઈ અને લીલાવતીબહેને લગ્ન કર્યાં હતાં.

એ પછી એમના ત્રણેત્રણ દીકરાએ પણ પ્રેમલગ્ન કર્યાં, માતા-પિતાના પગલે! આ ક્રમ અહીં અટકતો નથી. અગ્રવાલપરિવારની ત્રીજી પેઢી એટલે કે સૌથી મોટા પુત્રની દીકરીએ પણ પ્રેમલગ્ન જ કર્યાં. એટલું જ નહીં, ઘરની એક માત્ર દીકરીની દીકરીએ પણ આ પરંપરા યથાવત્ રાખી દોઢ વર્ષ પહેલાં પ્રેમલગ્ન કર્યા!

પ્રેમ શોધવા લાંબા શા માટે થવું?

લીલાવતીબહેન અને રાજ કિશોર અગ્રવાલના સૌથી મોટા દીકરા સુભાષભાઈએ તો પ્રેમીપાત્ર શોધવા લાંબું પણ થવું પડ્યું નહોતું. જી હા, જેને જોઈને એમના દિલમાં ગીતના સૂર ઊમટી પડ્યા હતા એ યુવતી શીલા એમના પડોશમાં જ રહેતી હતી.

એલઆઈસી (LIC)નું કામ કરતા સુભાષભાઈ ચિત્રલેખાને કહે છેઃ