બૅન્ક એકાઉન્ટ ફ્રીઝ કરાવો... ફરી ચાલુ કરાવવા તગડા પૈસા પડાવો...

કોઈ વેપારી-ઉદ્યોગપતિ પર ખોટા આરોપ મૂકી એમનાં બૅન્કનાં ખાતાં બંધ કરાવી દેવાનાં (એવી સત્તા ન હોવા છતાં!) અને પછી બીજા સરકારી વિભાગ પાસે તપાસ કરાવવાની ધમકી આપી તોડબાજી કરવાની. ગુજરાતના અમુક પોલીસ અધિકારીઓએ પોતાનાં ગજવાં ભરવા હમણાં આ રસ્તો અપનાવ્યો છે. ગુજરાત પોલીસના તોડકાંડનો પર્દાફાશ

- મહેશ શાહ (અમદાવાદ)

ત્રણેક મહિના પહેલાંની વાત. કેરળની એક ફાઈનાન્સ કંપનીના સંચાલક કાર્તિક ભંડારીએ જૂનાગઢ પોલીસની સાઈબર ક્રાઈમ બ્રાન્ચના એક અધિકારીને ફોન પર વિનંતી કરી ‘સર, મારું એચડીએફસી બૅન્કનું ખાતું થોડા સપ્તાહ અગાઉ ફ્રીઝ થયું છે. એ એકાઉન્ટ અનફ્રીઝ (ફરી ચાલુ) કરાવવા માટે શું કરવું પડશે?  

પોલીસ તરફથી સંતોષજનક જવાબ કે ઉકેલ ન મળ્યો એટલે કાર્તિક ૧૬ જાન્યુઆરીએ પોતે જૂનાગઢ જઈને સાઈબર સેલના બે પોલીસ અધિકારીને મળ્યો. એમાંના એક, આસિસ્ટન્ટ સબ-ઈન્સ્પેક્ટર દીપક જાનીએ કંઈક આમ કહ્યું: ‘તમારા ખાતામાં મોટી રકમનાં ટ્રાન્ઝેક્શન થયાં છે એટલે ઈડી (એન્ફોર્સમેન્ટ ડિરેક્ટોરેટ)ને જાણ કરવી પડશે. ગાંધીનગર કે અમદાવાદમાં સાઈબર ક્રાઈમની ઑફિસમાં તમારું એકાઉન્ટ અનફ્રીઝ કરાવવા જશો તો બૅલેન્સના અંદાજે ૮૦ ટકા રકમ લેશે. એ કરતાં પચ્ચીસ લાખ આપીને વાત અહીં પૂરી કરી દો.’

 આર્થિક ગેરરીતિ કે દેશદ્રોહી કારનામાંના આરોપીનાં બૅન્ક એકાઉન્ટ અમુક કિસ્સામાં પોલીસ બંધ (ફ્રીઝ) કરાવી શકે. આ ખાતું અનફ્રીઝ ન થાય ત્યાં સુધી એમાંથી એક પૈસો ઉપાડી ન શકાય. ટૂંકમાં, એમાંથી કોઈ નાણાકીય વ્યવહાર ન થઈ શકે.પોતાની સાથે કારણ વગર આવું થયું અને ખાતું ફરી શરૂ કરાવવા તોતિંગ રકમની માગણી કરવામાં આવી એટલે કાર્તિક ડઘાઈ ગયો, છતાંય ચારેક લાખ રૂપિયા આપવાની એણે તૈયારી દાખવી. જો કે પોલીસે વીસેક લાખનો આગ્રહ રાખ્યો એટલે એણે વકીલની સલાહ લીધી. પછી હિંમતભેર જૂનાગઢ પોલીસ રેન્જના ઈન્સ્પેક્ટર જનરલ (આઈજી) નીલેશ જાજડિયાને રૂબરૂ મળીને પોતાની કથની કહી.

નીલેશભાઈએ તપાસ કરાવી. એમાં ચોંકાવનારી વિગત જાણવા મળી અને એમાં મોટા ભાગની કાર્તિક કહ્યા મુજબની.