ધીરુભાઈને એકમેવ અંજલિ...

દેશઆખાને શૅરબજારમાં રસ લેતો કરનારા ટોચના ઉદ્યોગપતિ ધીરુભાઈ અંબાણીની ૯૧મી જન્મતિથિનાં થોડાં સપ્તાહ અગાઉ પ્રગટ થયેલા પુસ્તકમાં પરિમલ નથવાણી વર્ણવે છે એમના વ્યક્તિત્વનાં કેટલાંક અજાણ પાસાં.

- કેતન ત્રિવેદી (અમદાવાદ)

૨૮ ડિસેમ્બર, ૧૯૩૨ના રોજ જન્મેલા ૨૮ ધીરુભાઈ હીરાચંદ અંબાણી ૨૦૦૭ની ૨૮ ડિસેમ્બરે અમૃત મહોત્સવ વર્ષ એટલે કે આયુષ્યના ૭૫મા વર્ષમાં પ્રવેશ્યા હોત. જૂનાગઢ જિલ્લાના ચોરવાડ જેવા નાના કસબામાં એક અકિંચન શિક્ષકના માંડ મૅટ્રિક સુધી ભણેલા પુત્ર એવા ધીરુભાઈ દુનિયાભરના શિક્ષાર્થીઓ અને શિક્ષિતો ઉપરાંત શિક્ષકો માટે પણ એક વિશિષ્ટ અભ્યાસક્રમ બની રહે એવું જીવન જીવી ગયા. એક એવું ભરપૂર જીવન, એવું ધબકતું જીવન, એવું સતત જિવાતું જીવન, એવું પામવાનું અને એવું પમાડવાનું જીવન, જેનો તાજેતરના ઈતિહાસમાં કોઈ જોટો જડે એમ નથી...

વેલ, આ તો વર્ષ ૨૦૦૭માં લખાયેલા એક લેખના અંશો છે. આજે જો ધીરુભાઈ હયાત હોત તો ૯૧ વર્ષના હોત, પરંતુ એમના દેહાવસાનને બે દાયકા વીતી ગયા હોવા છતાં ગુજરાતીઓનાં અને ભારતીયોનાં માનસ માં એ વ્યક્તિત્વ હજુ જીવંત છે. ભારતીય ઉદ્યોગજગતમાં પૉલિયેસ્ટર કિંગ, પેટ્રોરસાયણોના પ્રણેતા, રિફાઈનરીઓના રાજા તરીકે જાણીતા અને ખાસ કરીને ગુજરાતી રોકાણકારો માટે તો શૅરબજારના સમ્રાટ એવા ધીરુભાઈ અંબાણીને આમ તો ઉદ્યોગજગતના વિવિધ ફોરમમાં આદર પૂર્વક યાદ કરાય જ છે, પણ એમની જન્મતિથિ, ૨૮ ડિસેમ્બર અને પુણ્યતિથિ, છ જુલાઈના રોજ એક વ્યક્તિ એમને અચૂક એટલે અચૂક યાદ કરે છે. એ છે પરિમલ નથવાણી.