બોગદાની પેલે પાર... આશાનું એક કિરણ!

અંધારું, ઠંડી, અનિશ્ચિતતા... શું વીતતી હશે ટનલમાં ફસાયેલા મજૂરો પર? ઉત્તરાખંડ ટનલ ટ્રેજેડીના બચાવકાર્યમાં તેજી જોવા મળી છે, ફસાયેલા ૪૧ શ્રમિકનાં સીસીટીવી ફૂટેજ જોવા મળ્યાં, એમને ઑક્સિજન, ગરમ ભોજન, મોબાઈલ ચાર્જર પહોંચાડવામાં આવ્યાં. આવા કેટલાક સારા સમાચાર વચ્ચે જાણીએ આ દુર્ઘટનાની કડીબદ્ધ કથા.

- નિતુલ ગજ્જર (વડોદરા)

મહિને એક તરફ વિક્રમ સંવત ૨૦૮૦ના આગમનને વધાવવા દેશભરમાં દિવાળી ધામધૂમથી ઊજવાઈ રહી હતી, ૨૦૨૩નો ક્રિકેટ વર્લ્ડ કપ ભારતીય ટીમ હસ્તગત કરે એ આશાનું કિરણ દેખાઈ રહ્યું હતું ત્યારે ઉત્તરાખંડમાં ટનલ ખોદવાનું કામ કરી રહેલા ૪૧ મજૂર કાટમાળ પાછળ ફસાતાં એમની સામે અંધકાર છવાઈ ગયો.

ઉત્તરાખંડમાં ચાર ધામ યાત્રા રોડ પ્રોજેક્ટ અંતર્ગત સિલ્ક્યારા ટનલ ખોદવાનું કામ ચાલી રહ્યું હતું એ વખતે આ અકસ્માત સર્જાયો. સિલ્ક્યારા  અને દંડલગાંઉ વચ્ચે બની રહેલી આશરે સાડા ચાર કિલોમીટર લાંબી ટનલનો અમુક હિસ્સો ધસી પડ્યો, એને પરિણામે ટનલમાં ૨૦૦ મીટર ઊંડે ૪૧ મજૂરો ફસાઈ ગયા. આ ઘટના ૧૨ નવેમ્બરની. એના નવ દિવસ (૨૧ નવેમ્બર) પછી પણ એ શ્રમિકોને બહાર કાઢવામાં સફળતા મળી નથી. બચાવકાર્ય હજી ચાલી રહ્યું છે અને દિલ્હીથી ખાસ નિષ્ણાતોની ટીમ બોલાવવામાં આવી છે, જે ટનલના મુખ પાસે ખોદકામ કરી મજૂરો સુધી પહોંચવાનો પ્રયાસ કરી રહી છે.

દુર્ઘટના બની એ દિવસથી ટીવી-સમાચાર અને અખબારોમાં આ ટનલમાં અંદર પ્રવેશવાના રસ્તાની તસવીર સતત ઝળકી રહી છે એ સિલ્ક્યારા તરફથી બોગદાની એન્ટ્રીની છે. અહીંથી ૨૦૦ મીટર અંદર બોગદામાં ચાલતાં જઈએ તો પેલા કમનસીબ શ્રમિકો મળે, પણ આ ૨૦૦ મીટરનું અંતર કાપવું સહેલું નથી, કારણ કે વાટમાં ખૂબ બધો કાટમાળ ફેલાયેલો છે. એટલો કે એણે બોગદાનું મોઢું લગભગ બંધ કરી દીધું છે.

ટનલનો અમુક હિસ્સો ધસી પડવાથી એમાં કાટમાળ છવાઈ થયો એ પછી છેક નવમે દિવસે અંદર ફસાઈ ગયેલા મજૂરોના ચહેરા જોવા મળ્યા.