લવ જિહાદનો વિવાદ એટલે ભારેલો અગ્નિ..

એક ફિલ્મને કારણે ફરી એક વાર હિંદુ-મુસ્લિમો સામસામે આવી ગયા છે. આ વખતે ખ્રિસ્તી સમાજ પણ ઘસડાયો છે. આ વિવાદમાં રાજકીય પક્ષો તો એમની રોટલી શેકીને જતા રહેશે, પણ કેરળની પ્રજાએ કથિત લવ જિહાદની ભ્રમણા અથવા તો વાસ્તવિકતા સુધી પહોંચીને એ રોગનાં મૂળને જડથી ઉખાડવાં જરૂરી છે.

- સમીર પાલેજા (મુંબઈ)

એ મને (શાસક કોંગ્રેસ અને સાથી પક્ષો) વીસ વર્ષમાં કેરળને મુસ્લિમ બહુમતીનું રાજ્ય બનાવી દેવું છે. લોકોને ઈસ્લામમાં કન્વર્ટ કરવા માટે પૈસો ખર્ચવા ઉપરાંત બીજા રસ્તાઓનો પણ ઉપયોગ થઈ રહ્યો છે. એમને (મુસ્લિમોને) હિંદુ છોકરીઓ સાથે પરણવા સમજાવવામાં આવે છે.

આ શબ્દો ભાજપ કે આરએસએસના કોઈ નેતાના નહીં, પણ બિનસાંપ્રદાયિક ગણાતા માર્ક્સવાદી પક્ષ (સીપીઆઈ-એમ)ના વરિષ્ઠ નેતા અને માજી મુખ્ય પ્રધાન વીએસ અચ્યુતાનંદનના છે, જેમણે ૨૦૧૦માં એક ઈન્ટરવ્યૂમાં કથિત લવ જિહાદ સામે બાંયો ચડાવી હતી.

એ અગાઉ ૯ ડિસેમ્બર, ૨૦૦૯ના દિવસે એક કેસના ચુકાદામાં ખુદ કેરળ હાઈ કોર્ટે રોમિયો જિહાદના સમાનાર્થી તરીકે લવ જિહાદ શબ્દનો પ્રયોગ કર્યો હતો. એ ચુકાદામાં કોર્ટે નોંધ્યું કે મુસ્લિમ છોકરાઓ બનાવટથી બિનમુસ્લિમ છોકરીને પ્રેમમાં પાડીને પછી એનું ધર્માંતરણ કરાવવાના પ્રયત્ન કરે છે. આવા સમાન કેસ આખા કેરળમાં બન્યા હોવાનું જણાય છે.

અરે, ૨૦૧૨માં કોંગ્રેસના સિનિયર નેતા અને કેરળના તત્કાલીન ચીફ મિનિસ્ટર ઓમેન ચાન્ડીએ પણ વિધાનસભામાં લેખિત જવાબ આપતાં કહ્યું હતું કે રાજ્યમાં ૨૦૦૬થી ૨૦૧૨ સુધી ૨૬૬૭ મહિલા સહિત ૭૭૧૩ લોકોએ ઈસ્લામ અંગીકાર કર્યો હતો. આની સામે ૨૮૦૩ વિધર્મીએ હિંદુ ધર્મ સ્વીકાર્યો હતો. ૨૦૦૯થી ૨૦૧૨ વચ્ચે ૨૧૯૫ હિંદુ અને ૪૯૨ ખ્રિસ્તી મહિલાએ ઈસ્લામ સ્વીકાર્યો હતો, એની સામે ખ્રિસ્તીમાં વટલાયેલી મહિલાની સંખ્યા ૭૯ અને હિંદુ થનારી મહિલા ફક્ત બે હતી.

જાણકારો કહે છે કે ૧૯૮૦ના દાયકામાં કેરળથી ગલ્ફમાં નોકરીએ જવાનું ચલણ વધ્યું ત્યારે સ્થાનિક મુસ્લિમો ઉગ્રપંથી ઈસ્લામના સંપર્કમાં આવ્યા. એમણે કેરળ પાછા આવીને એનો પ્રચાર કર્યો. કેરળ પોલીસના ઈન્ટેલિજન્સ ડિપાર્ટમેન્ટના રિપોર્ટમાં લખેલું કે ૨૦૧૧થી ૨૦૧૫ વચ્ચે કોઝીકોડ અને મામલાપુરમનાં બે ધાર્મિક સ્થાનકોમાં ૫૭૯૩ લોકોને મુસ્લિમ બનાવવામાં આવ્યા હતા, એમાં ૪૭૧૯ હિંદુ અને બાકીના ખ્રિસ્તી હતા. કન્વર્ટ થયેલામાં અડધી સંખ્યા મહિલાની હતી અને એમાંથી ૭૬ ટકા મહિલા ૩૫ વર્ષથી ઓછી વયની હતી!